11-nji iýulda Türkmenistanyň Daşary işler ministri Raşid Meredow Ýaponiýanyň Daşary işler ministriniň parlament işleri boýunça orunbasary Ýumi Ýoşikawa bilen duşuşyk geçirdi.
Duşuşygyň dowamynda türkmen-ýapon hyzmatdaşlygynyň syýasy-diplomatik, söwda-ykdysady we medeni-ynsanperwer ugurlar boýunça ileri tutulýan wezipeleri ara alnyp maslahatlaşyldy.
R.Meredowyň belleýşine görä, Türkmenistan dostluk, ynanyşmak hem-de özara düşünişmek ýörelgeleri esasynda köp ýyllaryň dowamynda alnyp barylýan türkmen-ýapon döwletara gatnaşyklarynyň mundan beýläk-de ösdürilmegine aýratyn ähmiýet berýär. Şunuň bilen bilelikde, ýokary derejedäki gatnaşyklaryň ikitaraplaýyn hyzmatdaşlygyň giňeldilmeginde we pugtalandyrylmagynda aýratyn orun eýeleýändigi nygtaldy.
Parlament diplomatiýasynyň uly ähmiýeti bellenildi. Muňa ikitaraplaýyn syýasy hyzmatdaşlygyň möhüm bölegi bolup durýan türkmen-ýapon parlament gatnaşyklary şaýatlyk edýär. Şu nukdaýnazardan, Türkmenistanyň Halk Maslahatynyň Başlygy Gurbanguly Berdimuhamedowyň geçen ýylyň sentýabrynda Ýaponiýa amala aşyran sapary möhüm ähmiýete eýe bolup durýandygy bellenildi.
Taraplar Türkmenistan bilen Ýaponiýanyň häzirki döwrüň möhüm meseleleri boýunça abraýly halkara düzümleriň çäklerinde, ilki bilen, BMG-de alyp barýan netijeli hyzmatdaşlygyny nygtadylar. Diplomatlar şeýle hem özara bähbitli gatnaşyklary mundan beýläk hem çuňlaşdyrmak babatynda taraplaryň «Merkezi Aziýa + Ýaponiýa» formatynyň çäklerinde önjeýli hyzmatdaşlyga ygrarlydygyny bellediler.
Ykdysady gatnaşyklaryň ösüşi barada aýtmak bilen, türkmen tarapy Türkmenistanyň we Ýaponiýanyň bu ugurda amala aşyrýan hyzmatdaşlygynyň strategiki, durnukly we uzakmöhletleýin häsiýete eýedigini tassyklady. Şunuň bilen baglylykda, Ykdysady hyzmatdaşlyk boýunça türkmen-ýapon we ýapon-türkmen komitetleriniň işine möhüm ähmiýet degişlidir.
Söhbetdeşler medeni-ynsanperwer ugur boýunça işjeň hyzmatdaşlygy nygtamak bilen, bilimde, ylymda, saglygy goraýyş ulgamynda, sportda we syýahatçylykda uly mümkinçilikleriň bardygyny tassyklasylar. Türkmenistanda ýapon dilini öwrenmek boýunça alnyp barylýan hyzmatdaşlyk barada hem aýratyn bellendi.
