Kanadaly şahyr, esseçi, terjimeçi we filolog Enn Karson edebiýat boýunça 2026-njy ýylyň Nobel baýragynyň eýesi boldy. Şwesiýanyň Akademiýasy bu çözgüdi 8-nji oktýabrda yglan etdi we baýragyň «Nusgawy däpler bilen erkin hemde döredijilikli gatnaşyk saklap, häzirki zaman edebiýatynda täze formalary döreden batyrgaý we täzeçil çemeleşmeleri üçin» berlendigini mälim etdi.

1950-nji ýylyň 21-nji iýunynda Torontoda dünýä inen Enn Karson Toronto uniwersitetini tamamlap, nusgawy edebiýat ugry boýunça bakalawr we magistr derejelerini aldy hem-de gadymy grek şahyry Sapfonyň döredijiligi boýunça dissertasiýa gorady, şeýle hem Sent-Endrýus uniwersitetinde bilim alyp, soňlugy bilen Kanadanyň we ABŞ-nyň uniwersitetlerinde nusgawy dilleri we edebiýaty okatdy.

Antik mifologiýasyny we nusgawy edebiýaty häzirki zaman sýužetleri hem-de görnüşleri bilen utgaşdyryp, şygryýeti, kyssany, essäni we beýleki sungatlary arkaýyn garyşdyrýan ýazyjy Simonidi, Sapfony, Eshili, Sofokly we Ýewripidi terjime etdi hem-de «Gyzylyň awtobiografiýasy», «Iş wagtyndan daşary adamlar» we «Ýaratmazlyk» ýaly meşhur kitaplary döretdi.

Goşgy bilen ýazylan «Gyzylyň awtobiografiýasy» romanynda Gerion we Gerakl baradaky antik rowaýat täzeçe işlenildi. Netijede, bu eser söýgi baradaky häzirki zaman wakasyna öwrüldi. Karson şeýle hem aradan çykan doganyna bagyşlap, suratlar, hatlar we tekstler bilen gutujyk görnüşinde bezelen «Noks» kitabyny neşir etdi. Mundan başga-da, ol islendik tertipde okap bolýan 22 sany aýratyn kitapdan ybarat «Float» eserini döretdi. Ýazyjynyň iň soňky uly işi bolan «Nädogry kada» atly kitaby bolsa 2024-nji ýylda okyjylara gowuşdy.

Ýazyjy Puşkart, Griffin we T.S.Eliot baýraklary, şeýle hem şahyrana terjimesi üçin PEN baýragy ýaly birnäçe abraýly edebi sylaglaryň eýesi boldy. Ol 2005-nji ýylda Kanada Ordenine mynasyp görüldi, 2020-nji ýylda bolsa edebiýat boýunça Asturiýa şa gyzynyň baýragyny aldy. Häzirki wagtda onuň eserleri dünýäniň köp dillere terjime edildi.

Gyzykly bolup bilerЕЩЕ ОТ АВТОРА