Hytaýyň Şandun oba hojalyk uniwersitetiniň hünärmenleri synag maksady bilen ekilen bir gektar meýdandan rekord derejede arahis (ýer pissesi) hasylyny aldylar. Bir gektardan 13 tonna golaý hasyl alnypdyr. Bu görkeziji ýurtdaky ortaça hasyldan 3,4 esse ýokarydyr. Mundan ozalky 11,7 tonnalyk rekord 2015-nji ýylda şol uniwersitetde hasaba alnypdyr. Bol hasylyň alynmagynda ýokary hilli tohumyň saýlanmagynyň, topragyň taýýarlanmagynyň we beýleki tehnologiýalaryň täsiriniň bardygy bellenildi.
2021-nji ýylda Hytaýda 4,75 million gektara ýer pissesi ekilip, 18,2 million tonna hasyl alnypdyr. Uniwersitetiň bilermenleriniň pikirine görä, eger bu tehnologiýa bütin ýurtda ulanylan ýagdaýynda 60 million tonna hasyl alyp bolar.
