Saud Arabystanynyň Jidda şäherinde geçirilen 20-nji FIFA Klublararasy Dünýä Kubogynda “Mançester Siti” çempionlyk gazandy. Şa Abdullah stadionynda geçirilen finalda polşaly Simon Marçiniak jürlewük çaldy. Duşuşyga 52 müňden gowrak janköýer tomaşa etdi.
Finalda Braziliýanyň “Fluminense” topary bilen duşuşan “Mançester Siti” garşydaşyny 4-0 hasabynda ýeňdi. Eýýam 1-nji minut dolmanka hasaby açan “Mançester Siti” toparynyň gollaryny Hulian Alwares (1, 88), Nino (27, ö.d.) hem-de Fil Foden (72) geçirdi. Şunlukda, “Mançester Siti” taryhynda ilkinji egzek bu kubogy eýeläp, şäherliler FIFA-nyň bu kubogyny gazanan 4-nji iňlis kluby hökmünde hasaba alyndy. Umumylykda 12-nji klub bolan “Mançester Sitiniň” tälimçisi Pep Guardiola 4-nji gezek bu kubogy eýeledi. Ispaniýaly hünärmen bu kubogy 3 dürli klub (“Barselona” – 2009, 2011, “Bawariýa” 2013) bilen alan ilkinji tälimçi boldy. Pep Guardiola karýerasyndaky 37-nji kubogyny gazanyp, bu ugurda Ser Aleks Fergusondan soň 2-nji ýerde barýar.
Toparyň ýarymgoragçysy Mateo Kowaçiç hem 3 dürli klub (“Real Madrid”, “Çelsi”, “Mançester Siti”) bilen bu kubogy gazanan ilkinji futbolçy hökmünde bellige alyndy.
Ispaniýaly Rodri ýaryşyň “Altyn top” baýragyna mynasyp boldy.
Bu kubogy 16-njy gezek Ýewropa topary gazanyp, 5 sapar çempion bolan “Real Madrid” sanawyň başyny çekýär. “Barselona” 3, “Korintians” bilen “Bawariýa” toparlary-da 2 gezek çempion bolmagy başardy. “Liwerpul, “Çelsi”, “Internasional”, “Sao Paulo”, “Mançester Ýunaýted”, “Milan” hem-de “Inter” klublary-da 1 gezek ýeňiji boldy.
“Mançester Siti” 2023-nji ýyldaky 5-nji kubogyny gazandy. Olar mümkin bolan 6 kubokdan diňe Angliýanyň Super Kubogyny gazanyp bilmediler.
