Ýene-de 2,5 ýyldan guraljak 23-nji FIFA Dünýä Kubogynyň açylyş hem-de final duşuşyklarynyň geçiriljek geçiriljek stadionlary mälim edildi. Dünýä Kubogy 2026 üç ýurtda – ABŞ-da, Meksikada hem-de Kanadada geçiriler. Ilkinji gezek 48 ýygyndynyň gatnaşjak çempionatynyň açylyş duşuşygy Meksikanyň paýtagty Mehiko Sitidäki dünýä belli “Azteka” stadionynda oýnalar. 87 müň 523 tomaşaçy orunlyk stadionda taryhda futbolyň iki uly ägirdi – braziliýaly Pele bilen argentinaly Maradona Dünýä Kubogyny asmana göteripdi.
Dünýä Kubogy 2026-nyň final duşuşygy bolsa Nýu Ýorkdaky “MetLife” stadionynda geçiriler. Amerikan futboly klublaryndan “Nýu Ýork Jaýents” hem-de “Nýu Ýork Jets” klublarynyň duşuşyklaryny geçirýän stadiony 82 müň 500 tomaşaça niýetlenendir.
2026-njy ýylyň 11-nji iýunynda başlanjak çempionat 19-njy iýulda-da tamamlanar. Çempionatda jemi 104 duşuşyk geçiriler. Şol duşuşyklar 16 şäheriň saýlanan stadionlarynda oýnalar. Şäherleriň 11-si ABŞ-nyň, 3-si Meksikanyň, 2-si Kanadanyň şäherleridir. ABŞ-nyň Nýu Ýork (“MetLife” – 82 500), Dallas (“AT&T Stadium” – 80 000), Kanzas Siti (“Arrowhead” – 76 416), Hýuston (“NRG Stadium” – 72 220), Atlanta (“Mercedes-Benz Stadium” – 71 000), Los Anjeles (“SoFi Stadium” – 70 240), Filadelfiýa (“Lincoln Financial Field” – 69 796), Siettl (“Lumen Field” – 69 000), San Fransisko (“Levi’s Stadium” – 68 500), Boston (“Gillette Stadium” – 65 878), Maýami (“Hard Rock Stadium” – 64 767), Meksikanyň Mehiko Siti (“Estadio Azteca” – 87 523), Monterreý (“Estadio BBVA” – 53 500), Gwadalahara (“Estadio Akron” – 49 850) hem-de Kanadanyň Toronto (“BMO Field” – 30 000), Wankuwer (“BC Place” – 54 500) şäherleri 23-nji Dünýä Kubogynyň duşuşyklaryny kabul eder.
Iň köp duşuşyk Dallasdaky “AT&T Stadium”-da geçirilip, bu stadionda 9 oýun oýnalar.
Jemi 12 toparça bolup, olaryň hersinde 4 ýygyndy çykyş eder. 1-2-nji ýeri eýelänler hem-de 3-nji orunda tamamlanlaryň iň gowy netije görkezen 8-si ýaryşy 1/16 finala çykar.
