Efiopiýanyň Daşary işler ministrliginiň habaryna görä, ýakyn wagtda Afrika Bileleşiginiň (AU) sammitine, azyndan, 34 Afrika lideri we halkara guramalarynyň ýolbaşçylary gatnaşar.
Afrika Bileleşigi 17-18-nji fewral aralygynda Efiopiýanyň paýtagty Addis-Abebede Afrika Bileleşiginiň döwlet we hökümet Baştutanlarynyň nobatdaky 37-nji maslahatynyň geçiriljekdigini habar berdi. Ondan öň 14-15-nji fewralda Afrika ýurtlarynyň daşary işler ministrleriniň gatnaşmagynda Afrika Bileleşiginiň Ýerine ýetiriji geňeşiniň nobatdaky 44-nji mejlisi bolar.
Efiopiýanyň daşary işler ministrliginiň metbugat sekretary Meles Alem metbugat üçin maslahatda öňde boljak Afrika Bileleşigi sammitine 34-den gowrak afrikaly Lideriň we ýokary derejeli resminiň gatnaşjakdygyny we ýakyn günlerde olaryň sanynyň ýene-de artyp biljekdigini aýtdy.
Ol sammite gatnaşýan abraýly adamlaryň arasynda 24 Prezidentiň, iki Premýer-ministriň, bir Patyşanyň, bäş wise-prezidentiň we iki daşary işler ministriniň boljakdygyny aýtdy.
Meles Alem sammite gatnaşmagyna garaşylýan halkara guramalarynyň görnükli liderleriniň arasynda BMG-niň Baş sekretary Antoniu Guterrişiň, Arap döwletleri ligasynyň baş sekretary Ahmed Abu al-Geýtiň, Ösüş boýunça hökümetara dolandyryş edarasynyň ýerine ýetiriji sekretary Workneh Gebeyehunyň, şeýle hem BMG-niň dürli edaralarynyň ýolbaşçylarynyň we beýleki guramalaryň wekilleriniň bardygyny habar berdi.
Afrika Bileleşiginiň maglumatlaryna görä, ýakyn wagtda geçiriljek sammitiň gün tertibinde birnäçe meseleler bolup, olaryň arasynda yklymda parahatçylyk we howpsuzlyk, söwda we integrasiýa, bilim we başarnyklar, oba hojalygy we howanyň üýtgemegi, dolandyryş we adam hukuklary, şeýle hem gender meseleleri we ýaşlaryň hukuklarynyň we mümkinçilikleriniň artdyrylmagy bar.
Afrika bileleşigi 1963-nji ýylyň maýynda döredilip, ilki Afrikanyň agzybirlik guramasy diýlip atlandyryldy. Ol häzirki adyna 2001-nji ýylda eýe boldy. Guramanyň düzüminde 55 döwlet bar. Onuň ştab-kwartirasy Addis-Abebe şäherinde ýerleşýär. Afrika Bileleşigine agza ýurtlaryň ilatynyň umumy sany 1,27 milliarddan gowrak bolup, esasan, arap, iňlis, fransuz, portugal we Afrika dillerinde gepleşýärler.
