AFK Çempionlar Ligasynda-da 1/8 finalyň duşuşyklaryna badalga berildi. Günbatar zolakda Saud Arabystanynyň klublarynyň özara duşuşygynda “Al Nassr” myhmançylykda “Al Fahýa” toparyny 1-0 hasabynda ýeňdi. Ýeke-täk goly 81-nji minutda Kristiano Ronaldo öz adyna ýazdyrdy. Bu onuň klublardaky 1000-nji duşuşygy bolup, ol 746-njy goluny derwezä girizdi (klublarda). Portugaliuýaly super ýyldyz şol 1000 duşuşykda 236 gola asist hem etdi. Şeýle-de bu gol Ronaldonyň penaltisiz geçiren 713-nji goly bolup, ol Messi bilen deňleşdi.
“Nasaf” (Özbegistan) bilen “Al Ainiň” (BAE) arasyndaky oýunda hasap açylmady.
Gündogar zolakda-da koreýleriň 2 klubunyň özara duşuşygynda “Çeonbuk Hýundai Motors” topary “Phohan Stilersden” Hernandes (17) hem-de An Hýeon-beomyň (64) gollary bilen 2-0 hasabynda üstün çykdy.
Hytaýyň “Şandon Taişan” topary öz meýdançasynda Ýaponiýanyň “Kawasaki Frontal” toparyndan 3-2 hasabynda asgyn geldi. Duşuşykda ýapon toparynyň gollaryny Erison (28 p), Marçinio (33) hem-de Ienaga (79), hytaýlylaryň gollary bolsa braziliýaly futbolçylar Fernandinio (67) bilen Žadson (85) derwezä girizdi. “Bangkok Ýunaýted” (Tailand) bilen “Ýokohama F. Marinos” (Ýaponiýa) klublarynyň duşuşygynda-da ýeňiş gazanan bolmady. 2-2 hasabynda deňlikde tamamlanan oýunda ýer eýeleri soňky minutlarda ýeňlişden halas boldy (Nitipong 35, Mahmud Eid 90+2 – Elber 18, Watanabe 24).
1/8 finalyň çäginde “Sepahan” (Eýran) – “Al Hilal” (Saud Arabystany), “Nawbahor (Özbegistan) – “Al Ittihad” (Saud Arabystany), “Ulsan Hýundai” (Günorta Koreýa) – “Wentforet Kofu” (Ýaponiýa) duşuşyklary şu gün oýnalar.
