BMG-niň Ženewadaky edarasynyň ýanyndaky Türkmenistanyň Hemişelik wekilhanasy “Bitaraplygyň halkara ölçegi” atly halkara çäre geçirdi

BMG-niň Ženewadaky edarasynyň ýanyndaky Türkmenistanyň Hemişelik wekilhanasy Türkmenistanyň hemişelik Bitaraplyk derejesiniň yglan edilmeginiň 30 ýyllygyna, şeýle hem ýurtda yglan edilen Halkara parahatçylyk we ynanyşmak ýylyna bagyşlanan “Bitaraplygyň halkara ölçegi” atly halkara çäräni gurady.
Bu çärä 300-den gowrak adam gatnaşdy, şol sanda diplomatik wekilhanalaryň ýolbaşçylary, halkara guramalarynyň, hökümete degişli bolmadyk guramalaryň, işewür toparlaryň ýolbaşçylary, ylmy jemgyýetçiliginiň we KHBS-niň wekilleri hem-de ýaşlar gatnaşdylar.
Ženewanyň Howpsuzlyk syýasaty merkeziniň (GCSP) Ýerine ýetiriji direktory, Ilçi Tomas Greminger gutlag sözi bilen çykyş edip, Türkmenistanyň parahatçylyk medeniýetiniň we döwletara gepleşikleriň ösmegine möhüm goşant goşandygyny aýtdy.
Türkmenistanyň BMG-niň Ženewadaky edarasynyň ýanyndaky Hemişelik wekili, Ilçi Wepa Hajiýew we Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň direktory Şiri Şiriýew esasy hasabatlar bilen çykyş etdiler. Çykyşlarynda olar hemişelik Bitaraplyk syýasatynyň gapma-garşylyklaryň öňüni almak, sebitdäki durnuklylygy we durnukly ösüşi üpjün etmek üçin täsirli gural hökmünde möhümdigini belläp geçdiler.
Panel ara alyp maslahatlaşmasyna Ženewanyň Bitaraplyk Merkeziniň Prezidenti, Kosta Rika Respublikasynyň we Birleşen Arap Emirlikleriniň BMG-niň Ženewadaky edarasynyň ýanyndaky Hemişelik wekilleri we Hindistan Respublikasynyň BMG-niň Ýaragsyzlanmak boýunça konferensiýasynyň ýanyndaky Hemişelik wekili gatnaşdy.
Milli we sebitleýin tejribä esaslanyp, mejlise gatnaşyjylar öz çykyşlarynda bitaraplyk baradaky düşünjelerini beýan edip, bu konsepsiýanyň häzirkizaman halkara şertlerinde köptaraplydygyny we ýerliklidigini bellediler.
Şeýle-de çäräniň çäklerinde birnäçe ikitaraplaýyn duşuşyklar geçirildi. Türkmenistanyň wekiliýeti bilen Ilçi Tomas Gremingeriň arasyndaky gepleşikleriň dowamynda diplomatiýa, durnukly parahatçylyk we bitaraplyk syýasaty boýunça hyzmatdaşlygyň geljekki mümkinçilikleri ara alnyp maslahatlaşyldy.