Global kofe bazary ösmegini dowam etdirýär, ýöne bu hoşboý ysly içginiň sarp edilişi dünýäniň dürli künjeklerinde düýpli üýtgeýär. Demirgazyk Ýewropa ýurtlary öňden gelýän kofe däpleri we ýokary girdejiler bilen öňe saýlanyp, adam başyna düşýän kofeniň sarp edilişiniň mukdary boýunça öňdeligi eýeleýär.
“Cafely” kompaniýasynyň maglumatlaryna esaslanyp taýýarlanan täze infografika 2025-nji ýylda adam başyna düşýän gündelik kofe sarp edilişi boýunça 65 ýurdy deňeşdirýär we dünýäde kofe içmek endikleriniň arasyndaky tapawutlary aýdyň ýüze çykarýar.
Demirgazyk Ýewropa kofe garaşlylygynyň global merkezi bolmagynda galýar. Lýuksemburg her adam başyna günde 5,31 çaşka kofe bilen dünýä sanawynda birinji orny eýeläp, ykdysadyýeti güýçli ýurtlardan ep-esli öňe saýlanýar.
Lýuksemburgyň ýokary görkezijisi “kros-borderler” – ýagny, serhetden geçip, işleýänleriň köp sanlysy bilen düşündirilýär. Ähli işçileriň tas ýarysy (47%) daşary ýurtlarda ýaşaýar we olaryň gündelik kofe sarp edilişi Beýik Gersoglygyň statistikasyna girizilýär.
Güýçli kofe medeniýetleri bilen öňden bäri tanalýan Finlýandiýa we Şwesiýa yzda galýar. Sanawyň ilkinji onlugyndakylaryň ählisi Ýewropa döwletleridir, bu bolsa ýaşaýjylaryň köpýyllyk isleglerini we olaryň satyn alyjylyk ukybyny görkezýär.
Absalýut sarp ediş möçberleriniň uludygyna garamazdan, ABŞ, Ýaponiýa we Braziliýa ýaly iri ýurtlar jan başyna has pes görkezijileri görkezýärler. Günde ortaça 1,22 çaşka içýän Birleşen Ştatlar 24-nji orunda durýar. Gülläp ösýän kofehanalary we konserwirlenen meşhur kofeleriniň bardygyna garamazdan, Ýaponiýada günde, bir çaşkadan az möçberde kofe içilýär. Dünýäniň iň uly kofe öndürijisi bolan Braziliýa 18-nji orunda gelip, 1,58 günde bir çaşka kofe içilýär.
Sanawyň soňunda ilatyň çaý ýa-da beýleki içgileri makul bilýän ýurtlary ýerleşýär. Hindistanda iň pes sarp ediliş hasaba alnyp, günde bary-ýogy 0,02 çaşka deň bolup, bu her ýedi hepdeden bir çaşka kofe barabardyr. Afrikanyň we Günorta Aziýanyň birnäçe ýurtlary hem pes görkezijileri görkezip, adatça, günde 0,3 çaşkadan az içýärler.

Gyzykly bolup bilerЕЩЕ ОТ АВТОРА