23-27-nji noýabrda Saud Arabystany Patyşalygynyň Er-Riýad şäherinde geçirilýän Birleşen Milletler Guramasynyň Senagat Ösüş Guramasynyň (UNIDO) 21-nji Baş konferensiýasyna Türkmenistanyň Senagat we gurluşyk önümçiligi ministri Toýguly Nurowyň ýolbaşçylygyndaky wekiliýet gatnaşýar.
BMG-niň resmi internet sahypasynyň berýän maglumatyna görä, hökümetlerden, hususy pudakdan we raýat jemgyýetinden gelen wekiller senagat ösüşiniň howanyň üýtgemeginden we azyk ýetmezçiliginden başlap, dünýäniň ýurtlaryna we işçilere deň derejede peýda berip biljek üpjünçilik zynjyrlaryny döretmäge çenli iň möhüm global kynçylyklary çözmäge nähili kömek edip biljekdigini ara alyp maslahatlaşýarlar.
«Senagat ösüşi ykdysadyýeti berkitmekde, garyplyga garşy göreşmekde, iş orunlaryny döretmekde we abadançylygy üpjün etmekde möhüm ähmiýete eýedir» diýip, BMG-niň Saud Arabystanyndaky wekili Mohamed El-Zarkani tarapyndan okalan BMG-niň Baş Sekretary Antonio Guterreş sammite gatnaşyjylara iberen ýüzlenmesinde aýtdy.
Şu hepdäniň ahyryna çenli 21-nji Baş Konferensiýanyň UNIDO-nyň indiki iki ýylda alyp barýan işine täsir etjek kararlary kabul etmegine garaşylýar. Bu kararlar senagat pudagynyň has ýaşyl, has adalatly we has durnukly dünýäni gurmaga nähili goşant goşýandygyna täsir edip biler.
Bu maslahatyň dowamynda wekiliýetler rezolýusiýa taslamalaryny gözden geçirerler, UNIDO-nyň işleri baradaky hasabatlary diňlärler we täze başlangyçlary ara alyp maslahatlaşarlar. BMG-niň beýanatyna görä, maslahatda Senagaty ösdürmek boýunça geňeşe we UNIDO-nyň işlerine gözegçilik edýän Maksatnama we býujet komitetine saýlawlara taýýarlyk görülmäge hem başlandy.

Gyzykly bolup bilerЕЩЕ ОТ АВТОРА