Laçynlary gorap saklamak boýunça maksatnamanyň çäklerinde soňky 30 ýylda iki müňden gowrak laçyn tebigy ýerlere goýberildi. Bu başlangyç Birleşen Arap Emirlikleriniň esaslandyryjysy we ýurduň ilkinji Prezidenti şeýh Zaýed ben Soltan Al-Nahaýýan tarapyndan 1995-nji ýylda ýola goýuldy. Bu ýyl maksatnama 30-njy möwsümini tamamlaýarka, 63 laçyn, şol sanda, 38 algyr, 25 elguş Gazagystanyň, Russiýanyň, Hytaýyň, Mongoliýanyň we goňşy ýurtlaryň käbir ýerlerini öz içine alýan sebitlerine goýberildi.
Bu sebitler laçynlar üçin amatly ýaşaýyş gurşawy hasaplanýar. Bu goýberiliş Gazagystanyň Oba hojalygy ministrliginiň Tokaý hojalygy we ýabany tebigat komitetiniň gözegçiligi astynda guraldy. Abu-Dabi we BAE tebigaty we ýabany jandarlary goramak, esasan hem, ekologik, medeni we taryhy ähmiýete eýe bolan laçynlar we beýleki ýabany jandarlaryň görnüşlerini gorap saklamak boýunça halkara derejesinde ykrar edilen tagallalarda öňdeligini dowam etdirýärler.
Şeýh Zaýediň laçynlary goýbermek maksatnamasyna gatnaşýan ähli laçynlar giň weterinariýa barlaglaryndan we intensiw taýýarlyklardan geçdiler. Adaty identifikasiýa halkalaryndan başga, ähli guşlara elektron çipler berkidildi. Guşlaryň käbiri Gün energiýasy bilen işleýän batareýalar arkaly hemra birikdirilen yzarlaýyş enjamlary bilen üpjün edildi. Bu olaryň diri galmagynyň derejesini, ýaýraýan we göçýän ugurlaryny yzarlamaga, şeýle hem, laçynlar üçin amatly ýerleri saýlamagy gowulandyrmak üçin ulanylýan ylmy maglumatlary toplamaga mümkinçilik berýär.

Gyzykly bolup bilerЕЩЕ ОТ АВТОРА