UEFA Çempionlar Ligasynda täze möwsümde liga tapgyrynda çykyş etjek 36 klub belli bolup, olaryň özara geçirjek duşuşyklarynyň bijeleri çekildi. Monte-Karlo şäherinde geçirilen bije çekiliş dabarasyna Zlatan Ibrahimowiç hem-de Kaka Leite gatnaşdy. Dabaranyň başynda UEFA-nyň Prezidenti Aleksander Çeferin şwesiýaly ýyldyz oýunçy Zlatan Ibrahimowiçe UEFA-nyň Prezidentiniň ýörite baýragyny gowşurdy.

Bije çekiliş emeli aňyň hem kömegi bilen awtomatik usulda geçirildi. Ýagny saýlanan toparyň haýsy toparlar bilen bäsleşjekdigi kompýuteriň kömegi esasynda kesgitlendi. Toparlar her torbadan 2 klub bilen bäsleşer we 8 oýnuň netijesinde iň köp utuk alan 8 topar 1/8 finala çykar. 9-24-nji ýeri eýelänler bolsa goşmaça pleý-off duşuşygyny geçirer we olaryňam 8-si 1/8 finala goşular. Her klub 8 duşuşygyň 4-sini öz meýdançasynda, 4-sini myhmançylykda oýnar.

Bijä laýyklykda, futbol janköýerlerine bu möwsümde has hem köp gyzykly duşuşyklar garaşýar.

Şolaryň arasynda PSŽ – “Bawariýa”, “Barselona” – PSŽ, “Real Madrid” – “Mançester Siti”, “Liwerpul” – “Real Madrid”, “Real Madrid” – “Ýuwentus”, “Mançester Siti” – “Borussiýa Dortmund”, “Bawariýa” – “Çelsi”, “Arsenal” – “Bawariýa”, “Inter” – “Liwerpul”, “Liwerpul” – “Atletiko Madrid”, “Borussiýa Dortmund” – “Inter”, “Inter” – “Arsenal”, “Çelsi” – “Barselona”, “Arsenal” – “Atletiko Madrid” we ýene-de ençeme gyzykly duşuşyklary agzamak bolar.

Taryhynda ilkinji gezek gatnaşýan “Kairatyň” iň esasy bäsdeşleriniň biri-de Madridiň “Realy” bolar. Başgaça aýdylanda, almatyly futbol janköýerleri öz şäherlerinde Ýer şarynyň iň uly klubunyň duşuşygyna tomaşa ederler.

 

Gyzykly bolup bilerЕЩЕ ОТ АВТОРА