“Samsung” kompaniýasy “Galaxy S25” seriýasyna degişli mobil enjamlary tanyşdyrdy. Dabarada “Galaxy S25”, “S25 Plus, “S25 Ultra” we “S25 Edge” smartfonlary tanyşdyryldy. Täze enjamlar emeli aň tehnologiýasy arkaly has köp ýeňillik döredýär, suratlary dury düşürýär. Täze seriýa degişli telefonlar has ýuka we ýeňil. Geliň, tanyşdyrylan telefonlaryň her biri barada aýratyn maglumatlara seredeliň.
“Galaxy S25”. Seriýanyň adaty görnüşi 3nm “Snapdragon 8 Elite” mikroprosessory bilen üpjün edilipdir. Mikroprosessor ozalkylardan telefonyň tizligini, güýjüni has-da artdyrýar. Seriýanyň beýleki ähli agzalarynda bolşy ýaly ýönekeý nusgasynda 12 GB RAM bar. Telefonyň ýady iki görnüşli – 128 GB hem-de 256 GB. S25-iň ululygy S24-iňki bilen deň. Telefonyň OLED ekranynyň uzynlygy 6,2 dýuým. Şeýle hem telefon geçen ýylky nusgadan 0,4 millimetr ýuka we birneme ýeňil. Telefonyň daşky gabarasy ozal ulanylan alýuminiň gaýtadan işlenmegi bilen gaýtadan öndürilen materialdan ýasalypdyr. Şeýle hem batareýasynyň azyndan 50 göterimi ozal ulanylan materialdan öndürilipdir. Telefonyň goýy gök, buz reňkli gök, narpyz reňkli ýaşyl we kümüş reňkli görnüşleri bar.
“Galaxy S25 Plus”. Bu telefonda hem “Snapdragon 8 Elite” mikroprosessor bilen üpjün edilipdir. Telefonyň ekrany geçen ýylky model bilen deň. “Galaxy S25”-de bolşy ýaly, telefonyň köp böleginde ulanylan materiallar ozal ulanylan materialyň gaýtadan işlenmeginden alnypdyr. Suwuň 1,5 metre aşagynda ýarym sagada çenli galanda telefona zeper ýetmeýär.
“Samsung Galaxy S25 Ultra”. Seriýanyň iň ulusy bolan “S25 Ultra” burçlarynyň tegelek bolmagy bilen ozalky nusgalaryndan tapawutlanýar. Şeýle hem telefon ozalky nusgalaryndan has ýeňil we ýuka. Yz tarapynda 50 megapiksel ultra giň, 200 megapiksel esasy, 50 megapiksel telefoto we 10 megapiksel ýakynlaşdyrýan kamera obýektiwleri bar.
“Galaxy S25 Edge”. Kompaniýa birmahallar mahabaty ýetirilen “Edge” telefonyny çykarmanyna köp wagt geçdi. Bu telefonyň iki gyrasy egri bolup, ekran telefonyň şol egri çarçuwasy bilen birigip gidýär. Seriýanyň bu nusgasy örän ýuka bolup, arka ýüzünde diňe iki kamera bar. Enjamyň maý aýynda köpçülige elýeterli boljakdygy mälim edildi.
Telefonlaryň internet arkaly sargyt kabul edilip başlanandygy we 9-njy fewraldan başlap, dükan tekjelerinde peýda boljakdygy mälim edildi.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА