Gyrgyzystan Gazagystanyň sebitdäki esasy strategik hyzmatdaşlaryndan biridir. Akordanyň metbugat gullugynyň maglumatlaryna görä, bu barada Gazagystanyň Prezidenti Kasym-Žomart Tokaýew mälim etdi.
-Ikitaraplaýyn söwdanyň möçberi, takmynan, 2 milliard dollara ýetdi. Bu görkezijini artdyrmak üçin ähli mümkinçilikler bar. Birnäçe bilelikdäki taslamany üstünlikli durmuşa geçirmäge mümkinçilik berýän maýa goýum hyzmatdaşlygy ýylsaýyn giňeýär. Suw we energetika pudagyndaky işlerimizi utgaşdyrýarys. Medeniýet we ynsanperwer ugurlardaky gatnaşyklar güýçlenýär – diýip, Tokaýew Gazagystanyň we Gyrgyzystanyň Ýokary döwletara geňeşiniň Bişkekdäki ýedinji mejlisinde eden çykyşynda belläp geçdi.
Gyrgyzystanyň Prezidenti Sadyr Žaparow Gazagystan bilen dostluk, hoşniýetli goňşuçylyk we gadymdan gelýän doganlyk ruhunda ählitaraplaýyn gatnaşyklary pugtalandyrmaga ygrarlydygyny aýtdy.
-Gazagystan biziň iň ýakyn goňşymyz, Gyrgyzystanyň daşary syýasatynda aýratyn orny eýeleýän we esasy söwda hyzmatdaşlarymyzyň biri bolan doganlyk ýurt – diýip, Žaparow aýtdy. Gyrgyzystanyň Prezidentiniň aýtmagyna görä, döwletleriň arasynda strategik hyzmatdaşlyk we özara gatnaşyklar ynamly ösýär.
Maslahatyň barşynda söwda-ykdysady, ulag-üstaşyr, suw-energetika, medeni-ynsanperwer ugurlarda hyzmatdaşlyk meselelerine garaldy. Resmi wekiliýetiň agzalary 2030-njy ýyla çenli ikitaraplaýyn söwda dolanyşygyny 3 milliard amerikan dollaryna çenli ýokarlandyrmak üçin “Ýol kartasyna” we beýleki hökümetara we pudagara resminamalara gol çekdiler.

Gyzykly bolup bilerЕЩЕ ОТ АВТОРА