PDF
Amerikanyň Milli futbol ligasy NFL-iň çempiony, ýagny “Super Bowl” duşuşygynda Lombardi kubogynyň eýesi belli boldy. ABŞ-nyň Luiziana ştatynyň Nýu Orleans şäherindäki “Caesars Superdome” arenada geçirilen 59-njy “Super Bowl” (Super Bowl LIX) duşuşygynda Milli futbol konfederasiýasy – NFC-niň çempiony “Filadelfiýa Iglz” bilen Amerikan futbol konfederasiýasy – AFС-niň çempiony “Kanzas Siti Çifs” toparlary duşuşdy. Çekeleşikli geçen duşuşyga 65 müň 719 janköýer tomaşa etdi.
1-nji çärýekde “Filadelfiýa Iglz” 7:0, 2-nji çärýekde 17:0 üstünlige eýe bolup, arakesmä 34:0 hasabynda öňde çykdy. 3-nji çärýekde-de 10:6 öňe saýlanan “Filadelfiýa Iglz” umumy hasapdaky üstünligi özünde saklamagy başardy. 4-nji çärýekde 16:6 hasabynda öňe saýlanan “Kanzas Sitiniň” bu üstünligi ýeňşe ýetmedi. Netijede, 40:22 hasabynda üstün çykan “Filadelfiýa Igzl” taryhynda 2-nji gezek çempionlyk gazanmagyň hötdesinden geldi. Bu ýeňiş garaşylmadyk çempionlyk hökmünde hasaba alyndy. Olar mundan öň 2017-nji ýylda “Super Bowl” duşuşygynda “Nýu Ingland Patriots” toparyny 41:33 hasabynda ýeňip, ilkinji çempionlyklaryny baýram edipdiler. “Filadelfiýa Iglz” topary mundan öň 3 gezek – 1980-nji, 2004-nji we 2023-nji ýyllarda finalda ýeňlipdi.
“Filadelfiýa Iglz” bilen “Kanzas Siti Çifs” toparlary geçen 2023-nji ýylda-da duşuşypdy we şonda kanzaslylar ýeňiş gazanypdy. 1969-njy, 2019-njy, 2022-nji we 2023-nji ýyllarda ýeňiş gazanyp, 4 çempionlygy bolan “Kansaz Siti Çifs” topary 1966-njy hem-de 2020-nji ýyllardan soň 3-nji gezek finalda asgyn geldi.
59-njy “Super Bowl” duşuşygynda oýnuň iň ökde oýunçysy diýlip, ýeňiş gazanan topardan Jeýlen Harts saýlandy. Duşuşygyň arakesmesinde Kendrik Lamar özüniň ilhalar aýdymlary bilen çykyş edip, stadiona ýygnan janköýerleriň hem-de teleýaýlym arkaly tomaşa edenleriň göwünlerini galkyndyrdy.
