PDF
Amerikanyň Birleşen Ştatlarynyň Tehas ştatynda ary öýjüklerini daşaýan uly ýük ulagynyň agmagy netijesinde iki million töweregi ary ekinlige çykdy. Ştatyň gündogaryndaky Moriswill şäherçesiniň golaýynda bolup geçen bu adatdan daşary waka zerarly ýerli häkimiýetiň wekilleri sebitiň ýaşaýjylaryna seresaplylyk çärelerini berjaý etmegi we öýlerinden çykmazlygy duýdurdylar.
Hünärmenleriň we gorag geýimli aryçylaryň gatnaşmagynda geçirilen gyssagly çäreleriň netijesinde waka gysga wagtyň içinde doly gözegçilige alyndy. Orenj okrugynyň adatdan daşary ýagdaýlar gullugynyň habar bermegine görä, halas edilen ary öýjükleri durnukly ýagdaýda ýerli balçylyk fermalaryna we aryçylara tabşyryldy. Ýerli häkimiýetler sebitde arassalaýyş we göçürme işleriniň howpsuz amala aşyrylandygyny mälim etdiler.
Bellenilişi ýaly, ABŞ-nyň uly awtomobil ýollarynda adaty bolmadyk ýükleri daşaýan ulaglar bilen bagly şeýle ýagdaýlar öň hem ýüze çykypdy. Ýurtda mundan ozal hem dürli azyk önümlerini we pirotehnika serişdelerini daşaýan ýük ulaglarynyň gatnaşmagynda iri ýol-ulag hadysalary hasaba alnypdy.
