PDF
Türkmen türgenleri iri halkara ýaryşlara gatnaşyp,dürli derejedäki sylaglara, şol sanda altyn medallara mynasyp bolýarlar.
Mälim bolşy ýaly, agyr atletikaçy türgenimiz Ýulduz Jumabaýewanyň 2018-nji ýylyň noýabr aýynda paýtagtymyz Aşgabatda geçirilen agyr atletika boýunça dünýä çempionatynda ýokary netije gazanypdy. Ozal netijeleri jemlenende nätakyklyga ýol berlen ýaryşlaryň jemleri boýunça türgen gyzymyz itekläp götermekde kümüş medalyň we silterläp götermekde bürünç medalyň eýesi bolupdy. Şonda şaýatlara mälim bolşy ýaly, Ýulduz altyn medala tarap ynamly gadam urupdy. Şonuň üçin eminleriň çözgüdi türgen gyzymyzy we janköýerleri örän gynandyrdy.
Ýaňy-ýakynda bolsa 2018-nji ýylyň dünýä çempionatynyň netijelerine gaýtadan seretmegiň hem-de dopinge garşy toparyň talaplaryna laýyklykda, medallary gaýtadan paýlamagyň esasynda türgen gyzymyza altyn medalyň gowşurylýandygy barada hoş habar gelip gowuşdy. Mundan başga-da, türgenimiz itekläp götermekde 104 kilogram agram bilen we jemi 179 kilogram agram bilen ýaşlaryň arasynda dünýä rekordyny täzeledi.
Halkara agyr atletika federasiýasynyň ýolbaşçysynyň Türkmenistanyň Prezidenti, Türkmenistanyň Milli Olimpiýa Komitetiniň Prezidenti Gurbanguly Berdimuhamedowa iberen hatynda bellenilişi ýaly, türkmen türgeniniň mynasyp bolan sylagy oňa şu ýyl geçiriljek agyr atletika boýunça halkara ýaryşyň barşynda gowşurylar. Şeýle hem bu hatda Türkmenistanyň Prezidentiniň ýurdumyzda sportuň agyr atletika görnüşini hem-de, umuman, sporty ösdürmäge, Olimpiýa hereketini wagyz etmäge goşýan goşandy barada aýdylýar.
Şunuň ýaly ajaýyp üstünlikleri gazanmagyň aňyrsynda şol bir wagtyň özünde türkmen agyr atletika mekdebiniň milli ýörelgeleriniň durandygyny hem bellemek gerek. Bu barada agzalanda türkmen sportunyň taryhynda ýitmejek uly yz galdyran ildeşimiz Altymyrat Orazdurdyýewiň gazanan üstünliklerini mysal getirmek bolar.
