Şotlandiýaly doganlar Maklinler Ýuwaş ummanyndan durmazdan we diňe küregiň güýji bilen hereket edýän gaýyk bilen iň gysga wagtda geçip rekord goýdular. Edinburgly Ýuen, Jeými we Laklan Maklin dagy aprel aýynda Perunyň Lima portundan 14 müň kilometrlik syýahatyna başladylar. Kürekçiler ýeňil materialdan ýasalan gaýygy bilen çylşyrymly howa şertlerindäki kyn syýahatyny 139 gün 5 sagat 52 minutda tamamladylar. Olar syýahatynyň dowamynda dürli kynçylyklara sezewar bolupdyrlar. Doganlaryň körpesi, 27 ýaşly Laklan iýulda güýçli ýel bolanda deňze gaçypdyr. Agalary ony şobada halas edipdirler.
Deňizçileri Awstraliýanyň Kerns portunda maşgala agzalary we halk köpçüligi gyzgyn garşy aldy. Şeýlelikde doganlar Günorta Amerikadan Awstraliýa aralygyny kürekli gaýykda geçen ilkinji topar hökmünde hem taryha girdiler.


Mundan ozal, 2014-nji ýylda russiýaly Fýodor Konýuhow Çiliden Awstraliýa çenli 11 müň 393 kilometre aralygy 159 gün 16 sagat 58 minutda geçip, rekord goýupdy.
Erkek doganlar bu rekordy Madagaskarda suw arassalaýjy desga gurmaga serişde toplamak maksady bilen goýdular. Olaryň syýahatynyň ahyryna çenli 700 müň funt sterlingden gowrak pul topladylar. Indi olar birneme dynç alandan soňra geljek hepde, Sidneýiň deňizçilik muzeýindäki çärä gatnaşarlar.
Ýuwaş ummanynyň Kaliforniýa-Gawai aralygy köp ulanylýan hem bolsa, köp deňizçi Günorta Amerikadan Ýuwaş ummanyna gitmek üçin bu ugry saýlamaýar. Şu ýyl Litwaly Aurimas Mokus şol ugur bilen çykan syýahatyny güýçli ýel sebäpli tamamlap bilmändi.

Gyzykly bolup bilerЕЩЕ ОТ АВТОРА