PDF
UEFA-nyň täze ýaryşy Konferensiýa Ligasynyň hem çempiony belli boldy. 5-nji gezek geçirilen ýaryşda 3-nji sapar iňlis topary ýeňiş gazandy.
Germaniýanyň Leispig şäherinde oýnalan finalda Angliýanyň “Kristal Palas” topary bilen Ispaniýanyň “Raýo Wallekano” topary duşuşdy. Çekeleşikli geçen finalda “Krsital Palas” topary 1-0 hasabynda ýeňiş gazandy. Londonlylara ýeňiş getiren ýeke-täk goly 51-nji minutda fransiýaly hüjümçi Žan-Filipp Mateta öz adyna ýazdyrdy. Şunlukda, ilkinji gezek UEFA-nyň ýaryşlarynda finala çykan iki toparyň arasyndaky duşuşykda “Kristal Palas” ýeňiş gazanyp, taryhy çempionlyga mynasyp boldy. Netijede, bu kubogy bassyr 2-nji, umumylykda 3-nji gezek iňlis kluby eýeledi. Şol sanda bu kubok bassyr 2-nji gezek London şäheriniň klublarynyň oýunçylarynyň ellerinde asmana göterildi.
“Kristal Palas” taryhynda 3-nji uly kubogyny gazandy. Londonlylar geçen möwsümde FA Kubogyny hem-de Angliýanyň Super Kubogyny eýeläpdi.
“Kristal Palas” toparynyň tälimçisi, awstriýaly hünärmen Oliwer Glazner UEFA-daky 2-nji kubogyny gazandy. 51 ýaşyndaly tälimçi 2021/22 möwsüminde “Aýntraht” bilen UEFA Ýewropa Ligasynyň çempiony bolupdy.
“Kristal Palas” topary möwsümiň başynda Ýewropa Ligasynda oýnamalydy. Ýöne Fransiýanyň “Lion” toparynyň eýesiniň bu klubda-da şäriklik paýynyň bolmagy sebäpli, UEFA-nyň düzgünine laýyklykda Konferensiýa Ligasynda oýnamaly edilipdi. “Lion” toparynyň eýesi “Kristal Palasdaky” paýnamasyndan ýüz öwürse-de, klubuň Ýewropa Ligasyna alynmagy üçin giç hasaplanypdy.
“Kristal Palas” täze möwsümde Konferensiýa Ligasynyň ýeňijisi hökmünde Ýewropa Ligasynda çykyş eder.
Şeýlelikde, UEFA-nyň 3 ýaryşynyň 2-sinde iňlis kluby çempionlyk gazanyp, 3-njisinde, esasysy hasaplanýan Çempionlar Ligasynyň finalynda-daenbe güni “Arsenal” bilen PSŽ duşuşar.
