“Ýuwentus” hem gaýtdy, Italiýadan diňe “Inter” galdy

UEFA Çempionlar Ligasynyň pleý-off tapgyrynda “Milan” bilen “Atalantadan” soň “Ýuwentus” üçinem ýaryş şu möwsümlik tamamlandy. Myhmançylykda Niderlandlaryň PSW topary bilen duşuşan “Ýuwentus” öz meýdançasynda 2-1 hasabynda ýeňipdi. Eýndhowendäki “Philips” stadionynda geçirilen duşuşygyň 1-nji ýarymynda hasap açylmady. 53-nji minutda 1-nji oýunda-da tapawutlanan Iwan Perişiç PSW-ni öňe saýlady. 10 minutdan soň Timoti Wea hasaby deňledi. Bu goldan 11 minutdan soň Ismael Saibariniň takyk urgusy bilen PSW 2-nji gezek öňe geçdi. Duşuşygyň esasy wagty şol hasap bilen tamamlanyp, ýeňiji goşmaça wagt kesgitlenmeli boldy. Goşmaça wagtda-da, has takygy, 98-nji minutda Raýan Flamingo PSW-niň 3-nji pökgüsini turinlileriň derwezesinden girizdi. Galan minutlarda-da “Ýuwentusa” jogap bermek başartmady. Şunlukda, “Ýuwentus” topary bassyr 3-nji gezek 1/8 finala çykyp bilmedi. PSW bolsa yzly-yzyna 2-nji, umumylykda-da 6-njy sapar 1/8 finalda oýnar. “Milandan” soň “Ýuwentusyň” hem niderland toparyndan utulmagy bellärliklidir. Çempionlar Ligasynda 1/8 finalda 5 klub bilen gatnaşan italýanlardan diňe “Inter” galdy. Ertir PSW topary “Arsenal” bilen ýa-da ýene bir italýan kluby, olaryň iň soňky wekili “Inter” bilen bije çekişer.