Şu gije tamamlanjak 23-nji Dünýä Kubogynda bürünç medal duşuşygy taryhy netije hasaba alyndy. Maýami Gardensdäki Hard Rock Stadium-da oýnalan Fransiýa bilen Angliýanyň arasyndaky oýunda janköýerler 10 goluň şaýady boldular.

Çempionlyk umytlary bilen gelip, ýarym finalda utulan iki lapykeç toparyň duşuşygy şu çempionatyň iň golly oýny hökmünde bellige alyndy. Iki toparyň tälimçisi hem meýdança esasy düzümden käübir oýunçyny çykardy.

Duşuşygyň 3-nji minutynda Deklan Raýs uzakdan urgy bilen hasaby açdy. 18-nji minutda burçdan urguda topy kellesi bilen Konsa derwezä girizip, hasaby 2-0-a çykardy. 1-nji ýarymda garşydaşyny derbi-dagyn eden iňlisleriň ýyldyzy Bukaýo Saka 37-nji hem-de 45+1-nji minutlarda 2 gol geçirip, aratapawudy hasam artdyrdy.

Milli ýygyndydaky 14 ýyllyk tälimçiliginiň iň soňky duşuşygyndaky bu hasap bilen kanagatlanmaýan Didie Deşam 2-nji ýaryma 4 oýunçy çalşygy bilen başlady. Deşamyň bu çalşygy oňyn miwesini berip, fransuzlar 20 minutda aratapawudy 1 gola düşürdiler. 48-nji minutda Mbappe çempionatdaky 9-njy goluny geçirdi. 54-nji minutda Barkola toparynyň 2-nji goluny öz adyna ýazdyrdy. 66-njy minutda tapawutlanan Mbappe 10-njy, umumylykda-da 22-nji goluny geçirdi. Bu goldan soňam fransuzlara hasaby deňlemek üçin mümkinçilikler bolsa-da, Maýkl Olise 2 sany örän amatly pursatdan ýerlikli peýdalanyp bilmedi.

Oýnuň 87-nji minutynda wenesuelaly emin Hesus Walensuelanyň bellän penaltisini dürs uran Saka het-trigini tamamlap, ol Dünýä Kubogynyň taryhynda pleý-offda bir duşuşykda 3 gol salan ikinji angliýaly futbolçy boldy.

Duşuşygyň 90+6-njy Usman Dembele fransuzlaryň 4-nji goluny geçirse-de, 2 minutdan soň Jud Bellingam iňlisleriň 6-njy pökgüsini fransuzlaryň derwezesinden geçirdi.

Netijede, 6-4 hasabynda ýeňiş gazanan Angliýanyň ýygyndysy 60 ýyldan soň, Dünýa Kubogynda medal gazanmagy başardy. Bu üstünlik 1966-njy ýylda çempionlyk gazanan Angliýanyň ýygyndysyny iň uly başarnygy boldy.

Duşuşykda 2 gezek tapawutlanan Kilian Mbappe bir Dünýä Kubogynda 10 gol geçiren 4-nji futbolçy bolup, şeýle statistika soňky sapar 1970-nji ýylda hasaba alnypdy.

Kilian Mbappe yzly-yzyna 2 çempionatda iň köp gol geçiren oýunçy bolan ilkinji futbolçy hökmünde taryha girdi.

Gyzykly bolup bilerЕЩЕ ОТ АВТОРА