PDF
Dünýäniň iň abraýly film festiwallarynyň hatarynda görkezilýän Kann kino şüweleňi tamamlandy. 78-nji geçirilen festiwal 11 günläp dowam etdi. Fransiýaly meşhur aktrisa Žuliett Binoşyň ýolbaşçylyk eden eminler topary baş baýraga – “Altyn palma” (Palme d’Or) baýragyna eýranly režissýor Jafar Panahiniň “Ýönekeý bir tötänlik” filmini laýyk gördi. Ussat režissýor baýragy oskarly aktrisa Keýt Blanşettiň elinden aldy. Şunlukda, Kann film festiwalynda 2-nji gezek eýran kinosy baş baýragy eýeledi. Mundan öň 1997-nji ýylda belli režissýor Abbas Kiorastaminiň “Üljäniň tagamy” film baş baýragy ýapon kinosy bilen paýlaşypdy.
Jafar Panahi uly 3 festiwalda baş baýragy alan 4-nji režissýor boldy. Panahiniň “Halka” filmi 2000-nji ýylda Wenesiýada “Altyn ýolbars”, “Taksi” filmi-de 2015-nji ýylda Berlinde “Altyn aýy” baýraklaryny gazanypdy. Panahiden öň fransiýaly Anri-Žorž Kloze, italiýaly Miçelanželo Antonioni hem-de amerikaly Robert Altman dünýäniň iň uly 3 film festiwalynda baş baýragy eýeläpdi.
Jafar Panahiniň başga filmleri-de Kann kino festiwalynda beýleki baýraklary hem gazanypdy. 1995-nji ýylda “Ak şar” filmi “Altyn kamera”, 2003-nji ýylda “Çym-gyzyl altyn” “Başgaça garaýyş” bölüminde eminleriň baýragyny, 2018-nji ýylda “3 sany ýüz” iň gowy ssenariý baýraklaryna laýyk görlüpdi.
78-nji Kann film festiwalynda “Gran Pri” baýragy norwegiýaly meşhur režissýor Ýoakim Trieriň “Duýguçyllygyň gymmaty” atly komediýa-drama görnüşli kinosyna berildi.
Eminleriň ýörite baýragyny 2 film paýlaşdy. Fransiýaly režissýor Oliwer Laşeniň “Sirat” hem-de germaniýaly Maşa Şilinskiniň “Ýykylmagyň sesi” filmleri Eminleriň ýörite baýragy bilen sylaglandy.
Iň gowy režissýor baýragyna braziliýaly belli hünärmen Kleber Mendonsa Filio laýyk görüldi. Ol Braziliýanyň 1970-nji ýyllary barada söhbet açýan “Syrly aňtawçy” kinosy bilen bu hormata mynasyp boldy. Filmde baş keşbi janlandyrýan Wagner Moura bolsa iň gowy aktýor baýragy bilen sylaglandy.
Iň gowy aktrisa baýragyny Körpe gyzy filmindäki keşbi üçin Nadia Melliti eýeledi. Iň gowy ssenariýa baýragy-da “Ýaş ejeler” filmi üçin belgiýaly režissýor doganlar Žan-Pier we Luk Dardenlere berildi.
Festiwalyň dowamynda Robert De Niro, Denzel Waşington hormat baýragy bilen sylaglandy.
Başgaça garaýyş bölüminiň çäginde baş baýraga çilili režissýor Diego Sespedesiň “Gyzyl injikleriň syrly bakyşy” filmi laýyk görüldi. Kolumbiýaly režissýor Simon Mesa Sotonyň “Şahyr” atly ekran eseri Eminleriň baýragy bilen sylaglandy.
Yrakly režissýor Hasan Hadiniň “Başlygyň süýjülik torty” atly filmi-de Altyn kamera baýragynyň ýeňijisi boldy.
“Altyn palma” baýragy: “Ýönekeý bir tötänlik” (Yek tasadof-e sadeh) – Jafar Panahi
“Gran Pri” baýragy: “Duýguçyllygyň gymmaty” (Affeksjonsverdi) – Ýoakim Trier
Eminleriň ýörite baýragy: “Ýykylyşyň sesi” (In die Sonne schauen) – Maşa Şilinski, “Sirat” (Sirat) – Oliwer Laşe
Iň gowy režssýor: Kleber Mendonsa Filio – “Syrly aňtawçy” (O Agente Secreto)
Iň gowy aktrisa: Nadia Melliti – “Körpe gyzy” (La petite derniere)
Iň gowy aktýor: Wagner Moura – “Syrly aňtawçy” (O Agente Secreto)
Iň gowy ssenariý: “Ýaş ejeler” (Jeunes meres) – Žan-Pier we Luk Dardenler
“Gran Pri” ýörite baýragy: “Täzeden direliş” (Kuangye Shidai) – Bi Gan
