ABŞ-nyň öňki Prezidenti Donald Tramp, 24-nji fewralda Günorta Karolina ştatynda geçirilen Respublikan partiýanyň praýmerizlerinde (deslapky saýlawlar) 59 göterim ses bilen ynamly ýeňiş gazandy. ABŞ-nyň BMG-däki öňki hemişelik wekili Nikki Heýli bolsa, 39 sese eýe boldy.
Trampyň bäsdeşi Nikki Heýli ýeňilendigini boýun aldy we Trampy ýeňşi bilen gutlady. Şeýle-de ol özüniň gubernatir bolan ştatynda ýeňlişine garamazdan, bäsdeşlige gatnaşmagyny dowam etdirjekdigini aýtdy. Indiki praýmerizler 27-nji fewralda Miçiganda geçiriler. Ýeri gelende belläp geçsek, Donald Trampyň Aýowa, Nýu-Gempşir, Newada ştatlarynda we Wirjin adalarynda geçirilen deslapky saýlawlarda hem ýeňiş gazandy.
Bu deslapky saýlawlar iýun aýynda tamamlanar. Iýul aýynda Respublikan partiýanyň gurultaýy geçirilip, onda prezidentlige dalaşgär yglan ediler. Awgust aýynda bolsa, Demokratik partiýanyň gurultaýy geçiriler. ABŞ-da geçiriljek Prezident saýlawlary 2024-nji ýylyň 5-nji noýabrynda meýilleşdirilýär.
2023-nji ýylyň 25-nji aprelinde ABŞ-nyň häzirki Prezidenti Jozef Baýden ýokary hökümet wezipesine gaýtadan saýlanmaga tagalla etjekdigini mälim etdi. 2022-nji ýylyň noýabr aýynda Donald Tramp saýlawlaryň öň ýanyndaky kampaniýalara gatnaşjakdygyny mälim etdi. Ol respublikanlar tarapyndan prezidentlige dalaşgär görkezmek ugrundaky bäsdeşlikde iň öňdebaryjy dalaşgär hasaplanyp, Heýli onuň ýeke-täk esasy bäsdeşidir. Nikki Heýli saýlaw bäsdeşliginden gitmek niýetiniň ýokdugyny telim sapar nygtady.
