Italiýa Ýewropada iň garry ilatly ýurt diýlip yglan edildi. Bu barada “24KZ” habar berýär. Ýurtda ilatyň ortaça ýaşy 48-den geçýär, bu bolsa, Ýewropa Bileleşiginde iň ýokary görkezijidir. Şeýle maglumatlary Ýewropa Bileleşiginiň Statistika edarasy mälim etdi.
Barlaglarda geçen asyryň 80-nji ýyllaryndan bäri Italiýada gartaşan adamlaryň yzygiderli artýandygy bellenilýär. Çaga dogulyşy bolsa azalýar. Bilermenler soňky ýagdaýy ýaşlar üçin durnukly işi tapmagyň we jaý satyn almagyň barha kynlaşýandygy bilen düşündirýärler. Bu bolsa nika baglaşylýan ýaşyň uzalmagyna getirýär. Eger-de ýagdaý şeýle depginde dowam etse Italiýada demografiki kynçylyk emele geler diýlip çaklanylýar.
