PDF
Şu gün Türkiýäniň Antalýa şäherinde sebitleýin, global we tematiki meseleler ara alnyp maslahatlaşyljak Üçünji diplomatik forum öz işine başlar.
Türkiýäniň Prezidenti Rejep Taýýip Erdoganyň başlangyjy bilen geçirilýän foruma 100-den gowrak ýurtdan 4 müňe golaý myhman, şol sanda 20-ä golaý döwlet we hökümet baştutanlary çagyryldy.
Türkiýäniň daşary işler ministrliginiň wekili Onju Keçeli, “Çökgünlik döwründe diplomatiýa ünsi jemlemek” mowzugy bilen guralýan foruma 60-dan gowrak döwletiň daşary syýasat edaralarynyň ýolbaşçylary, şeýle hem 80-e golaý halkara we sebit guramalarynyň wekilleriniň gatnaşjakdygyny aýtdy.
Şeýle hem, 50 sany sessiýa we panel maslahatlary geçirmek meýilleşdirilýär.
Forumyň çäklerinde Prezident Erdogan aýry-aýry ýurtlaryň wekilleri bilen birnäçe ikitaraplaýyn duşuşyklary geçirer diýlip garaşylýar.
2023-nji ýylda Antalýadaky diplomatik forum fewral aýynda ýurtda bolup geçen ýertitremeleriň netijeleri sebäpli yza süýşürildi.
2022-nji ýylda foruma 17 döwlet baştutany, 80 daşary işler ministri we 40-a golaý halkara guramanyň wekilleri gatnaşdy.
