Beýik Britaniýanyň Lankaster uniwersitetiniň menejment bölüminiň barlag geçirijileri howa ýollarynyň hereketini dolandyrmaga täzeçe çemeleşmäni işläp düzdüler. Ol emeli aň tehnologiýalaryny ulanmaga esaslanýar. Bu baradaky makala “Transport Science” (TRSC) atly ylmy žurnalda çap edildi.
Sanly modelirlemäniň we optimizasiýanyň utgaşmasynyň kömegi arkaly alymlar uçarlaryň gonuş yzygiderliligini kesgitlemegiň iň gowy tärini oýlap tapdylar. Bu adaty “birinji geldi – birinji hyzmat edildi” düzgüni bilen deňeşdirilende, howadaky gijikmeleri 20 göterimden gowrak azaltmaga we howa menziliniň ähli amallarynda ýerbe-ýerligi ýokarlandyrmaga mümkinçilik berdi.
Barlag geçirijiler gatnaw wagtlarynyň, uçuş gijikmeleriniň, howa şertleriniň we beýleki ýagdaýlaryň öňünden bilip bolmajak häsiýeti sebäpli howa menzilleriniň işiniň bökdençlige uçraýandygyny belleýärler.
Uçarlaryň gonuş yzygiderliligini optimizasiýalaşdyrmagyň häzirki usullary howa hereketini guramagyň ähli aýratynlyklaryny hemişe göz öňünde tutmaýar. Alymlaryň aýtmagyna görä, bu meseleleriň hötdesinden diňe emeli aň gelip biler. Neýroulgam kyn şertlerde kabul ediljek çözgütleriň netijelerini seljerer we iň gowy teklipleri hödürlär.
