UEFA Çempionlar Ligasynda az salym öň çärýek finalyň hem-de ýarym finalyň bijeleri çekildi. Bijä laýyklykda soňky çempion “Mançester Siti” kubogy iň köp eýelän “Real Madrid” bilen bije çekişdi. Soňky 2 çempion bassyr 3-nji möwsümde gabatlaşarlar. 2021/22 we 2022/23 möwsümlerinde toparlar ýarym finalda duşuşypdylar we ilki “Real Madrid”, soňra “Mançester Siti” ýeňiş gazanyp, soňlugy bilen kubogy eýeläpdiler.
“Barselona” bilen PSŽ, “Arsenal” bilenem “Bawariýa” duşuşar. Tapgyryň iň pesräk bijesi-de “Atletiko Madrid” bilen “Borussiýa Dortmundyň” arasyndaky bije boldy.
Çärýek finalyň 1-nji duşuşyklary 9-10-njy aprelde, jogap oýunlary bolsa 16-17-nji aprelde geçiriler.
Ýarym finalda-da “Mançester Siti” – “Real Madrid” duşuşygynyň ýeňijisi “Arsenal” – “Bawariýa” duşuşygynyň ýeňijisi bilen güýç synanyşar. Beýleki ýarym finalda-da “Barselona” – PSŽ duşuşygynda ýeňiş gazanan topar bilen “Atletiko Madrid” – “Borussiýa Dortmund” duşuşygynda ýeňiş gazanan topar finala çykmak üçin özara göreşer. Ýarym finalyň 1-nji oýunlary 31-nji aprel we 1-nji maýda, jogap duşuşyklary-da 7-8-nji maýda oýnalar.
Final duşuşygy 1-nji iýunda “Wembley” stadionynda geçiriler.
