UEFA Çempionlar Ligasynda möwsüm ahyrlap barýar. Şu hepdäniň sişenbe we çarşenbe günleri, ýagny 9-10-njy aprelde ýaryşyň çärýek finalynyň 1-nji duşuşyklary geçiriler. Çärýek finalda futbol janköýerlerine yklymyň öňdebaryjy 8 klubunyň arasynda çekeleşikli we dartgynly duşuşyklaryň 8-si garaşýar. Duşuşyklaryň ählisi-de Aşgabat wagty bilen 00:00-da başlanar. Sişenbe güni “Arsenal” – “Bawariýa”, “Real Madrid” – “Mançester Siti” duşuşyklary geçiriler. Londondaky oýunda şwesiýaly Glenn Nýuberg, Madriddäki duşuşykda-da fransiýaly Fransua Leteksie jürlewük çalar.
“Arsenal” bilen “Bawariýa” UEFA-nyň ýaryşlarynda 13-nji gezek özara duşuşarlar. Iki toparyň arasyndaky soňky 3 duşuşykda “Bawariýa” 5-1 hasabynda ýeňiş gazandy. Mundan öňki 12 duşuşykda “Bawariýa” garşydaşyny 7 gezek ýeňdi. “Arsenalda” bu görkeziji 3-e deňdir. 2 oýun hem deňlikde tamamlandy. Iki topar ilkinji gezek 2000/01 möwsüminde toparçada gabatlaşdylar. Şonda “Bawariýa” ilki myhmançylykda deňme-deň oýnap (2-2), öz meýdançasynda 1-0 hasabynda ýeňipdi. Şondan soň iki topar 3 gezek 1/8 finalda duşuşyp, ählisinde-de çärýek finala çykan “Bawariýa” bolupdy. Iň ýatda galan 1/8 finalyň duşuşyklary-da 2012/13 möwsümine hasaba alnyp, “Arsenal” 1-nji oýunda Londonda 3-1 hasabynda utulýar. Jogap oýnunda gazanylan 2-0 hasabynda ýeňiş iňlis klubuna ýeterlik bolmaýar. 2012/13 – 2016/17 möwsümi aralygyndaky 5 möwsümde toparlar 4 gezek gabatlaşyp, “Bawariýa” “Arsenalyň” ýagysy bolýar.
2000/01 möwsümi toparçalarda:
“Arsenal” – “Bawariýa”: 2-2 (Anri 4, Kanu 55 – Tarnat 56, Şoll 66),
“Bawariýa” – “Arsenal”: 1-0 (Elber 10);
2004/05 möwsümi 1/8 finalda:
Bawariýa – Arsenal: 3-1 (Pizarro 4, 58, Salihamdziç 65 – Ture 88),
“Arsenal” – “Bawariýa”: 1-0 (Anri 66);
2012/13 möwsümi 1/8 finaly:
“Arsenal” – “Bawariýa”: 1-3 (Podolski 55 – Kroos 7, Müller 21, Manžukiç 77),
“Bawariýa” – “Arsenal”: 0-2 (Žiru 3, Kosielni 86);
2013/14 möwsümi 1/8 finalda:
“Arsenal” – “Bawariýa”: 0-2 (Kroos 54, Müller 88),
“Bawariýa” – “Arsenal”: 1-1 (Şwanştaýger 55 – Podolski 57);
2015/16 möwsümi toparçalarda:
Arsenal” – “Bawariýa”: 2-0 (Žiru 77, Özil 90+4),
“Bawariýa” – “Arsenal”: 5-1 (Lewandowski 10, Müller 29, 89, Alaba 44, Robben 55 – Žiru 69);
2016/17 möwsümi 1/8 finalda:
“Bawariýa” –“Arsenal”: 5-1 (Robben 11, Lewandowski 53, Alkantara 56, 63, Müller 88 – Aleksis Sançes 30),
“Arsenal” –“Bawariýa”: 1-5 (Walkott 20 – Lewandowski 55 p, Robben 68, Duglas Kosta 78, Widal 80, 85).
