Italiýanyň Kubogy ýaryşynda finalçylar belli bolup, “Ýuwentus” bilen finalda duşuşarlar. 1-nji oýunda öz meýdançasynda 2-0 ýeňen “Ýuwentus” myhmançylykda “Lasiodan” 2-1 hasabynda ýeňilse-de, finala çykdy. Kastelýanosyň 12-nji we 48-nji minutlardaky gollaryna 83-nji minutda Arkadiuş Milik bilen jogap beren “Ýuwentus” toparynyň şol gol finala çykmagy üçin ýeterlik boldy. Kubogy 14 gezek eýelän “Ýuwentus” 22-nji sapar finala çykdy.
“Ýuwentusyň” finaldaky garşydaşy “Atalanta” boldy. “Atalanta” topary 1-nji oýunda 1-0 utulan garşydaşy “Fiorentinany” 4-1 hasabynda ýeňlişe sezewar etdi. “Atalanta” topary 53-nji minutdan soň 1 oýunçy kem oýnan “Fiorentinanyň” derwezesinden ýeňiş gollarynyň 2-sini 90-njy minutdan soň geçirdi (Koopmeýners 8, Skamakka 75, Lukmen 90+5, Paşaliç 90+8 – Martines Kuarta 68). Şunlukda, “Atalanta” topary soňky 6 ýylda 3-nji, umumylykda 6-njy gezek finala çykdy (1963, 1987, 1996, 2019, 2021, 2024). Bergamo şäheriniň wekili diňe 1 gezek ýeňiji boldy (1963).
“Atalanta” bilen “Ýuwentus” 2021-nji ýyldan soň 2-nji gezek finalda duşuşarlar. Şol finalda “Ýuwentus” 2-1 hasabynda ýeňiş gazanypdy. 77-nji gezek geçirilýän Italiýanyň Kubogy ýaryşynda “Atalanta” bilen “Ýuwentusyň” arasyndaky final duşuşygy 15-nji maýda Rimdäki “Olimpico” stadionynda geçiriler.
