UEFA öz guramaçylygyndaky 4 klub ýaryşynyň finalynda jürlewük çaljak eminleri mälim etdi. Şoňa görä, 1-nji iýunda Londondaky “Wembley” stadionynda “Borussiýa Dortmund” bilen “Real Madridiň” arasyndaky UEFA Çempionlar Ligasynyň finalyna sloweniýaly Slawko Winçiç eminlik eder. Oňa Tomaş Klançnik, Andraz Kowaçiç ýardam berse, oýnuň 4-nji emini fransiýaly Fransua Leteksie bolar.
22-nji maýda Irlandiýanyň paýtagty Dublin şäherindäki “Awiwa” stadionynda “Atalanta” bilen “Baýeriň” arasynda oýnaljak Ýewropa Ligasynyň finalynda rumyniýaly Iştwan Kowaç jürlewük çalar. Wasile Florin Marinesku bilen Mihail Owidiu onuň kömekçileri bolar. Duşuşygyň 4-nji emin slowakiýaly Iwan Kruzliak diýlip bellenildi.
UEFA-nyň täze ýaryşy bolan Ýewropa Konferensiýa Ligasynyň finalynda portugaliýaly Artur Soareş Diaş eminlik eder. 29-njy maýda Gresiýanyň paýtagty Afinydaky “AEK Arena”-da oýnaljak finalda “Olimpiakos” bilen “Fiorentina” duşuşar. Diaşa Paulo Soare bilen Pedro Ribeiro kömekçi bolar. Oýnuň 4-nji emin diýlip, şwesiýaly Glenn Nýuberg bellenildi.
Şeýle-de 25-nji maýda Ispaniýanyň Bilbao şäherindäki San Mames stadionynda boljak “Barselona” bilen “Olimpik Lion” toparlarynyň arasyndaky UEFA Zenanlar Çempionlar Ligasynyň finalyna angliýaly Rebekka Welş eminlik eder. Welşiň kömekçileri Natalie Aspinall bilen Emili Kariý bolsa, oýunda horwatiýaly Iwana Martinçiç 4-nji emin bolar.
