Şu gün paýtagtymyzdaky “Ýyldyz” myhmanhanasynda Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyna bagyşlanyp, medeniýet ministrleri derejesinde halkara maslahaty geçirildi. Myhmanhananyň foýesinde milli medeniýetimize degişli gymmatlyklar, amaly-haşam sungatynyň önümleri, ussat senetçileriň el işleri, deriden, aýnadan, matadan taýýarlanan sowgatlyk harytlar, torbalar, bukjalary we beýlekiler görkezildi.
Magtymguly Pyragy bagyşlanan medeniýet ministrleri derejesindäki halkara maslahata Türkmenistanyň Ministrler Kabinetiniň Başlygynyň orunbasary Mährijemal Mämmedowa, medeniýet ministri Atageldi Şamyradow, Türkiýäniň medeniýet we syýahatçylyk ministri Mehmet Nuri Ersoý, Täjigistanyň medeniýet ministri Matlubahon Sattori, Katar Döwletiniň medeniýet ministri Şeýh Abdulrahman bin Hamid bin Jasim bin Hamad Al-Tani, Gazagystanyň medeniýet we maglumat ministri Aida Balaýewa, Ermenistanyň bilim, ylym, medeniýet we sport ministri Žanna Andreasýan, Azerbaýjanyň medeniýet ministriniň orunbasary Murad Guseýnow, Russiýanyň medeniýet ministriniň orunbasary Andreý Malyşew, Gruziýanyň medeniýet, sport we ýaşlar ministriniň birinji orunbasary Ioseb Bagaturiýan, Gyrgyzystanyň medeniýet, maglumat, sport we ýaşlar syýasaty ministriniň orunbasary Esengul Uly Çyngyz, Özbegistanyň medeniýet ministriniň birinji orunbasary Bahodir Ahmedow we başga-da köp sanly döwletden wekiliýetler gatnaşdy.
Şeýle hem halkara maslahata halkara guramalaryň birnäçesiniň, hususan-da TÜRKSOÝ guramasynyň Baş sekretary Sultan Raýew, GDA-nyň Baş sekretarynyň birinji orunbasary Leonid Anfimow, Ykdysady Hyzmatdaşlyk Guramasynyň Baş sekretarynyň orunbasary Huseýin Awni Byçakly, ÝUNESKO-nyň işleri barada milli toparlarynyň wekilleri çagyryldy.
Halkara maslahatynyň açylyş dabarasynda Türkmenistanyň Prezidentiniň maslahat gatnaşyjylara iberen Gutlagy okaldy. Gutlagda – Nusgawy türkmen şahyry Magtymguly Pyragynyň doglan gününiň 300 ýyllygy mynasybetli medeniýet ministrleri derejesinde halkara maslahatyň geçirilmegi örän ähmiýetlidir. Bu maslahat medeni ulgamda özara bähbitli hyzmatdaşlygy kämilleşdirmäge, geljekde bu ugurda alnyp baryljak işleri has-da ösdürmäge, Magtymgulynyň baý edebi mirasyny çuňňur öwrenmäge we dünýäde giňden wagyz etmäge uly itergi berer. Çünki beýik akyldar Magtymguly Pyragy öz şygyrlarynyň üsti bilen dünýä halklaryny agzybirlige, dost-doganlyga, ynsanperwerlige çagyran, Ýer ýüzünde parahatçylygyň dabaralanmagyny arzuwlan şahyrdyr – diýlip bellenilýär.
Halkara maslahatda edilen çykyşlarda türkmen halkynyň uly sarpalanýan beýik şahyry, akyldary we nusgawy şahyry Magtymguly Pyragynyň dünýä jemgyýetçiligindäki ornunyň uludygyny bellediler.
Maslahatdaky çykyşlarda Magtymguly Pyragynyň diňe bir türkmen halkynyň däl, eýsem dünýä jemgyýetçiliginiň şahyryna öwrülendigini belläp, Türkmenistanda üstümizdäki ýylda giňden bellenilip geçilýän Magtymguly Pyragynyň doglan gününiň 300 ýyllygyna bagyşlanyp, öz ýurtlarynda hem giň gerimli çäreleriň geçirilip, beýik şahyryň öwüt-nesihata ýugrulan goşgularynyň öz ýurdunyň giň okyjylar köpçüligine ýetirilýändigini bellediler. Şeýle hem çykyş edenler Magtymguly Pyragynyň goşgularynyň dünýäniň beýleki dillerine terjime edilip, okujylar köpçüligine ýetirilendigini, heýkeliniň dürli ýurtlaryň şäherlerinde oturdylandygyny belläp geçdiler.
TÜRKSOÝ guramasynyň Baş sekretary Sultan Raýew öz çykyşynda TÜRKSOÝ tarapyndan 2024-nji ýyl «Türki dünýäsiniň beýik şahyry we akyldary Magtymguly Pyragy ýyly» diýlip yglan edilendigini, şol bir wagtda Magtymguly Pyraga bagyşlanan halkara ähmiýetli çäreleriň diňe bir TÜRKSOÝ däl, eýsem BMG-niň Nýu-Ýorkdaky esasy merkezi binasynda, BMG-niň Ženewadaky merkezi edarasynda, Ýewropa döwletleriniň çäklerinde giň gerimde geçirilýändigini belledi.
Halkara maslahata gatnaşyjylar şu gün Magtymguly Pyragy medeni-seýilgäh toplumynyň hem-de beýik şahyrymyzyň heýkeliniň açylyş dabarasyna gatnaşarlar.
