Russiýanyň “Roskosmos” döwlet korporasiýasynyň kosmonawtlarynyň serkerdesi, Halkara kosmos bekedinde TASS habarlar gullugynyň ýörite habarçysy Oleg Kononenko kosmos giňişliginde 1000 gün bolan dünýäde ilkinji adam boldy. Bu barada “Roskosmos” döwlet korporasiýasy habar berdi.
– Halkara kosmos bekedinde iş alyp barýan “Roskosmos” döwlet korporasiýasynyň kosmonawty Oleg Kononenko dünýäde ilkinji bolup, kosmos giňişliginde müň gije-gündiz galmagy başaran kosmonawt boldy – diýip, metbugat beýanatynda bellenilip geçilýär.
Kosmonawtlaryň serkerdesi karýerasyndaky 5-nji kosmos uçuşyny amala aşyrdy. 4-nji fewralda ol rus komonawty Gennadiý Padalka degişli bolan 878 günlük rekordyny täzeledi. Şu aýyň 21-ine 60 ýaşy arka atýan Kononenko kosmos missiýasyny tamamlan wagty onuň älem giňişliginde galan wagty 1110 güne ýeter.
1964-nji ýylyň 21-nji iýunynda Türkmenistanyň Türkmenabat şäherinde dünýä inen Oleg Kononenko 2008-nji ýylyň aprelinde ilkinji kosmos saparyny amala aşyrdy. Özüniň ilkinji kosmos missiýasyny tamamlan Oleg Kononenko Russiýa Federasiýasynyň Gahrymany derejesi berlipdi. Oleg Kononenko şol bir wagtda Türkmenistanyň Gahrymany diýen belent adyň hem eýesidir.
Kononenko şu ýylyň 23-nji sentýabryna yzyna – Ýere gaýdyp geler.
