Ýewropa çempionatyna gatnaşýan 24 ýygyndynyň tälimçileriniň 16-syna her ýurduň ýerli hünärmeni tälim berip, 8 ýygynda başga ýurduň tälimçileri, legioner hünärmenler tälimçilik edýär. 24 ýygyndynyň tälimçileriniň arasynda iň köp italiýaly tälimçilere duş gelmek bolýar. Italiýanyň milli ýygyndysynyň tälimçisi Luçano Spallettiden başga-da 4 ýurda tälim berýän baş tälimçiler italiýaly hünärmenlerdir. Türkiýäniň ýygyndysyna Winçenzo Montella, Slowakiýanyň ýygyndysyna Françesko Kalzona, Wengriýanyň ýygyndysyna-da Marko Rossi tälim berýän italiýaly tälimçilerdir. Belgiýanyň ýygyndysynyň 38 ýaşyndaky tälimçisi Domeniko Tedeska hem italiýaly tälimçi bolup, onuň Germaniýanyň raýatlygy hem bar.
Italiýadan soň iň köp germaniýaly, fransiýaly hem-de ispaniýaly tälimçiler bolup, ady agzalan bu ýurtlaryň hersinden 2 hünärmen Ýewropa çempionatyna gatnaşýar. Germaniýadan ýerli milli ýygyndynyň tälimçisi Ýulian Nagelsmanndan başga Awstriýanyň milli toparyna-da meşhur hünärmen Ralf Rangnik tälimçilik edýär. Fransiýanyň ýygyndysynyň tälimçisi Didie Deşam bilen taryhynda ilkinji gezek yklym ýaryşyna wekilçilik edýän Gruziýanyň tälimçisi Willi Sanýol çempionatyň fransiýaly tälimçileridir. 2 goňşy ýurduň tälimçileri – Ispaniýanyň ýygyndysynyň tälimçis Luis de la Fuenta hem-de Portugaliýanyň ýygyndysynyň tälimçisi Roberto Martines ispaniýaly hünärmenlerdir. Çempionata 2-nji gezek gatnaşýan ýene bir ýygyndynyň tälimçisi hem legioner bolup, Albaniýanyň ýygyndysyna braziliýaly ozalky meşhur çep gyraky goragçy Silwinio tälim berýär. Ol EURO 2024-däki ýeke-täk ýewropaly bolmadyk tälimçidir. Galan milli ýygyndylara-da öz ýerli hünärmenleri tälim berýär.
Tälimçilileriň arasynda iň ýaşulusy-da, ýaş kiçisi-de germaniýaly tälimçilerdir. Ralf Rangnik 65 ýaş 351 gün bilen çempionatyň iň ýaşuly, Ýulian Nagelsmann bolsa 36 ýaş 327 ýaş bilen iň ýaş tälimçisidir. Iň ýaşuly 2-nji tälimçi Luçano Spalletti (65 ýaş), iň ýaş 2-nji tälimçi-de Domeniko Tedeskadyr (38 ýaş). Şeýle-de, 24 tälimçiniň arasyndan iň uzak wagtlap häzirki işini dowam etdirip gelýäni Fransiýanyň tälimçisi Didie Deşam bolup, çempionatyň finalynyň oýnaljak günlerinde onuň Fransiýanyň ýygyndysynyň tälimçiligine bellenine 12 ýyl dolar.
