Ýene-de sanlyja sagatlardan futbolyň öňdebaryjy yklymy bolan Ýewropany 17-nji Ýewropa çempionaty gurşap alar. Bir aýlap dowam etjek çempionatyň açylyş duşuşygynda ýer eýesi Germaniýa bilen Şotlandiýanyň ýygyndylary duşuşar. Duşuşyk Aşgabat wagty bilen 00:00-da başlanar. Münhen şäherindäki Allianz Arena-da geçiriljek oýna fransiýaly Klemen Turpen eminlik eder.
Bu olaryň Ýewropa çempionatynyň çägindäki 2-nji duşuşyk bolup, birinji oýunda Germaniýa 2-0 hasabynda ýeňiş gazanypdy (1992). Umumylykda bolsa 18-nji duşuşyk bolup, öňki 17 oýunda Germaniýa 8, Şotlandiýa 4 gezek ýeňiş gazanyp, 5 duşuşyk deňlikde tamamlandy (26-23).
