17-nji Ýewropa çempionatynda D toparçanyň soňky duşuşyklary diýseň çekeleşikli geçdi. Toparçanyň lideriniň ýygy- ýygydan üýtgän duşuşyklarynyň netijesinde garaşylmadyk topar 1-nji orny eýeledi.
5 goluň geçirilen oýnunda Awstriýanyň ýygyndysy Niderlandlaryň ýygyndysyny 3-2 hasabynda ýeňilişe sezewar etdi. Awstriýanyň gollaryny 6-njy minutda ýalňyşlyk bilen öz derwezesinden geçiren Malen, 59-njy minutda Şmid hem-de 80-nji minutda Sabitzer derwezä girizdi. Awstriýanyň geçiren ilkinji 2 golunyň öwezini dolup, 3-njisine jogap berip ýetişmedik Niderlandlaryň gollaryny Gakpo (47) bilen Depaý (75) öz atlaryna ýazdyrdy. 3-2 hasabynda ýeňiş gazanan Awstriýanyň ýygyndysy toparçada 1-nji orny eýeledi. Awstriýanyň ýygyndysy 1/8 finalda E toparçanyň ilkinjisi bilen duşuşar.
Çempionlygyň iň esasy faworitleriniň hatarynda görkezilen Fransiýanyň ýygyndysy toparçada 4-nji orny eýelän Polşanyň ýygyndysyna garşy hem garaşylýan oýny görkezip bilmedi. Duşuşyk Mbappe (56) hem-de Lewandowskiniň (79) penaltiden geçiren garşylykly gollary esasynda 1-1 hasabynda deňlikde tamamlandy. Mbappeniň geçiren goly onuň Ýewropa çempionatlaryndaky ilkinji goly hökmünde hasaba alyndy. 5 utuk toplan Fransiýa 2-nji ýeri eýeläp, olar 1/8 finalda E toparçanyň ikinjisi bilen duşuşar.
