ABŞ-da dowam edýän 48-nji Kopa Amerika çempionatynda toparçadaky duşuşyklar tamamlanyp, çärýek finala çykanlar belli boldy. Ýaryşy guraýjy ABŞ-nyň, şol sanda Meksikanyň çärýek finala çykyp bilmän, olaryň ornuna Wenesueladyr Panamanyň ýaryşy dowam etmegi köpleri geň galdyrdy.
Çempionlygyň iki dalaşgäri çärýek finalda duşuşar
Çärýek finalda 5-nji iýulda Argentina bilen Ekwadoryň (06:00), 6-njy iýulda Wenesuela bilen Kanadanyň (06:00), 7-nji iýulda-da Kolumbiýa bilen Panamanyň (03:00) hem-de çempionlygyň 2 esasy dalaşgäri Urugwaý bilen Braziliýanyň (06:00) ýygyndylary duşuşarlar. Duşuşyklar Aşgabat wagty bilen daňdanlar oýnalar.
Çärýek finalyň iň esasy duşuşygy Urugwaý bilen Braziliýanyň arasyndaky oýun hasaplanýar. Nobatdaky oýun olaryň özara 80-nji duşuşygy bolar. Iki toparyň mundan öňki 79 duşuşygynda Braziliýa 38, Urugwaý 21 gezek ýeňiş gazandy. 20 oýun deňlikde tamamlanyp, braziller 142, urugwaýlylar 100 gol geçirdi.
Ýarym final duşuşyklary 10-11-nji iýulda, 3-nji ýer üçin duşuşyk 14-nji iýulda, final duşuşygy bolsa 15-nji iýulda daňdan wagtlarda oýnalar.
48-nji Kopa Amerikanyň çärýek final duşuşyklary
5-nji iýul (anna)
Argentina – Ekwador (06:00) – “NRG Stadium” – Hýuston, Tehas
6-njy iýul (şenbe)
Wenesuela – Kanada (06:00) – “AT&T Stadium” – Arlington, Tehas
7-nji iýul (ýekşenbe)
Kolumbiýa – Panama (03:00) – “State Farm Stadium” – Glendeýl, Arizona
Urugwaý – Braziliýa (06:00) – “Allegiant Stadium” – Paradaýs, Newada
