ABŞ-nyň öňki Prezidenti Donald Trampyň aýaly Melaniýa Tramp, iki görnüşde terjimehal kitabyny çykarjakdygyny mälim etdi. Bu barada ABŞ-nyň öňki birinji hanymynyň web saýtynda habar berilýär. “Melaniýa” atly kitapda şahsy babatda kämillige ýeten, päsgelçilikleri ýeňip geçip, durmuşda öz ýoluny goýan zenanyň güýçli taraplary we başdan geçiren ylham beriji wakalary barada gürrüň berilýär.
“Kitapda özboluşly durmuşda ýaşan öňki birinji hanymyň keşbi bütin aýdyňlygy bilen beýan edilip, okyjylary öz dünýäsine imrindirýär” diýlip, ýatlamalar kitabynyň sözbaşysynda bellenilýär. Kitabyň sahypalarynda ozal hiç ýerde çap edilmedik suratlaryň we gürrüňleriň boljakdygy habar berilýär.
ABC teleýaýlymy kitabyň güýzde çapdan çykjakdygyny belleýär. Teleýaýlymyň habaryna görä, öňki birinji hanym kitabyň çykjak takyk senesini yglan etmedi, ýöne resmi web sahypasynda kitabynyň iki jildi üçin öňünden sargytlary kabul edýändigini habar berdi. Onuň kitabynyň birinji jildi 256 sahypadan ybarat bolup, onda “Melaniýa” diýlip gol çekilen suratlary ýerleşdirilen. Ikinjisi 304 sahypadan ybarat giňeldilen görnüşi bolup, şahsy arhiwinden alnan 59-a golaý surat bilen bezelipdir. Bu kitabyň Melanýanyň öz durmuşy barada ýazan ilkinji kitabydygy agzalýar. Teleýaýlymyň habaryna görä, bu kitap ozal Donald Trampyň egindeşleri bilen işleşen “Skyhorse Publishing” neşirýaty tarapyndan çap ediler.
