UEFA Çempionlar Ligasynda final tapgyryna gatnaşjak soňky 7 kluby kesgitleýän pleý-off tapgyrynyň 1-nji duşuşyklary geçirildi.
Çempion toparlaryň arasyndaky duşuşyklarda Şweýsariýanyň “Ýang Boýz” topary Türkiýäniň çempiony “Galatasaraýy” 3-2 hasabynda ýeňdi. 1-nji ýarymda Monteironyň 3-nji we 45+4-nji minutlarda geçiren gollary bilen ýer eýeleri 2-0 hasabynda öňe saýlandy. 2-nji ýarymda oýna goşulan Miçi Batşuaýi 66-njy we 72-nji minutlarda hasaby deňledi. Oýnuň 86-njy minutynda VAR-yň görkezmesi boýunça germaniýaly Daniel Sibert ýer eýeleriniň peýdasyna penalti urgusyny belledi. Ony-da Ugriniç dürs urup, toparyna ýeňiş getiren oýunçy boldy.
Zagrebde ýerli “Dinamo” bilen Azerbaýjanyň “Garabag” toparlary duşuşyp, horwatlar 3-0 hasabynda ýeňiş gazandy. Gollary 29-njy minutda Pýaça bilen 75-nji we 80-nji minutlarda Kulenowiç derwezä girizdi.
Daniýanyň “Midtýullan” topary öz meýdançasynda Slowakiýanyň “Slowan Bratislawa” topary bilen 1-1 hasabynda deňme-deň oýnady (Çilufiýa 79 – Bläkmän 59). Norwegiýanyň “Bude-Glimt” topary öz meýdançasynda “Srwena Zwezda” bilen duşuşdy. Çekeleşikli geçen oýunda ýer eýeleri 2-1 hasabynda üstün çykdy (Býortuft 52, Maatta 62 – Mimowiç 75).
Şwesiýanyň çempiony “Malmö” öz meýdançasynda Praganyň “Sparta” toparyndan 2-0 hasabynda asgyn gelip, final tapgyryna çykmak mümkinçiligini kyn ýagdaýa getirdi. Myhmançylykdan ýeňiş bilen dolanan çehleriň gollaryny Stryger Larsen (31, ö.d.) hem-de Rynýeş (89) geçirdi.
Çempion däl toparlaryň duşuşyklarynyň 2-si hem 2-0 hasabynda tamamlandy. Kiýewiň “Dinamosy” Polşada Awstriýanyň “Red Bull Salsburg” toparyndan 2-0 hasabynda ýeňildi. Salsburglylara ýeňiş getiren gollary Dorgeles (29) bilen Kýergor (50 p) derwezä girizdi. Edil şonuň ýaly, Fransiýanyň “Lill” topary-da Praganyň beýleki kluby “Slawiýany” öz meýdançasynda 2-0 hasabynda utdy. Duşuşykda gollary Dewid bilen Žegrowa öz atlaryna ýazdyrdylar.
Jogap duşuşyklary 27-28-nji awgustda oýnalar. 29-njy awgustda-da UEFA Çempionlar Ligasynyň täze formatda geçiriljek ilkinji möwsüminiň liga tapgyrynyň (ozalky toparçalaýyn) bijeleri çekiler.
“Ýang Boýz” – “Galatasaraý”: 3-2
“Dinamo Zagreb” – “Garabag”: 3-0
“Midtýullan” – “Slowan Bratislawa”: 1-1
“Bude-Glimt” – “Srwena Zwezda”: 2-1
“Malmö” – “Sparta Praga”: 0-2
“Dinamo Kiýew” – “Red Bull Salsburg”: 0-2
“Lill” – “Slawiýa Praga”: 2-0
