2-nji sentýabrda Russiýanyň Prezidenti Wladimir Putin iki günlük resmi sapar bilen Mongoliýa bardy. Mongol kärdeşi Uhnaagiýn Hurelsuh belent mertebeli myhmanyny Ulan-Batoryň merkezi meýdançasynda hormat garawulynyň nyzama düzülen dabarasynda garşylady. Soň iki ýurduň ýolbaşçylary Döwlet köşgündäki ak öýde gepleşiklere başladylar.
-Russiýa Federasiýasy bilen Mongoliýanyň arasyndaky gatnaşyklar, dürli kynçylyklara garamazdan, söwda gatnaşyklary we söwda dolanyşygy babatda ösüş ýoluna düşdi – diýip, Russiýanyň Prezidenti Wladimir Putin mongol kärdeşi bilen geçirilen gepleşikleriň başynda aýtdy.
3-nji sentýabrda geçirilen gepleşiklerde Mongoliýanyň Prezidenti Uhnaagiýn Hurelsuh oktýabr aýynyň ahyrynda geçiriljek BRICS sammitine gatnaşmak baradaky Putiniň çakylygyny kabul etdi. Soňra iki ýurduň Prezidentleri birnäçe resminamalara gol çekdiler. Mundan başga-da döwlet Baştutanlary ikitaraplaýyn gatnaşyklaryň, halkara we sebit meseleleriniň möhüm ugurlaryny ara alyp maslahatlaşdylar.
Şeýle hem, Putin Beýik Huralyň (bir palataly mejlis) başlygy Daşzegwiýn Amarbaýasgalan we Premýer-ministr Luwsannamsraýn Oýun-Erdene bilen duşuşyk geçirdi.
Putin soňky gezek Mongoliýada bäş ýyl mundan öň bolupdy.
