Kosmos bekedinde ýa-da gämisinde iş alyp barýan kosmonawtlaryň dürli sebäpler bilen açyk asmana çykmaklaryna “kosmos ýörişi” diýilýär. Golaýda hususy eýeçilige degişli kosmos gämisindäki ilkinji kosmos “ýörişi” amala aşyryldy. “SpaceX” kompaniýasynyň “Polaris Dawn” atly missiýasynyň çäklerinde 4 adam Ýeriň orbitasyna çykaryldy. Bu missiýany amerikan işewüri, milliardr Jared Aýzekman maliýeleşdirdi. 10-njy sentýabrda milliarderiň ýany bilen ozalky uçarman Skott Potit, “SpaceX” kompaniýasynyň inženerleri Anna Menon bilen Sara Gillis hem kosmosa gitdi. Bu topar “Dragon” kosmos gämisi bilen 732 kilometr belentlige çykdylar. Kosmosda 5 güne golaý bolan astronawtlar dürli tejribeleri geçirdiler. Syýahatyň dowamynda ilki Aýzekman, soňra Gillis bir ýüpden tutup, kosmos gämisiniň daşyna çykdylar. Astronawtlar kompaniýanyň inženerleri tarapyndan işlenip taýýarlanan ýörite eşikleri geýdiler, “Starlink” aragatnaşyk hemralarynyň mümkinçiliklerini barlap gördüler. Aýzekman we Gillis kosmos “ýörişini” amala aşyran 264-njy we 265-nji astronawtlar boldular.
