UEFA Çempionlar Ligasynyň täzelenen formatdaky möwsüminiň ilkinji tapgyrynyň duşuşyklary tamamlandy. Geçirilen 18 oýunda dürli hasabatlar ýüze çykdy.
18 duşuşykda jemi 57 gol hasaba alnyp, oýunlaryň 10-synda ýer eýeleri, 5-sinde myhmanlar ýeňiş gazandy. Deňlikde gutaran 3 duşuşykda-da hasap açylmady. Golsuz deňlikde tamamlanan duşuşyklaryň 2-si Italiýada geçirildi. Umumylykda deňme-deň tamamlanan duşuşyklarda taraplaryň biri italýan klublary boldy.
5 klubly gatnaşýan Germaniýanyň 3 kluby ýeňiş gazandy, 2 topary-da utuldy. 5 toparly ýurtlardan italýanlaryň 1 kluby ýeňip, 1 kluby utuldy, 3 kluby-da golsuz deňme-deň oýnady. 4 klubly ýurtlardan Fransiýanyň 3 kluby ýeňşini baýram etdi (1 ýeňliş). Iňlis klublarynyň 2-si ýeňse, 2-si deňme-deň oýnady. Ispan toparlarynyň 2-si Madrid şäheriniň wekilleri 3 utuk aldy, ýöne Kataloniýa sebitiniň wekilleri ýeňlişe sezewar boldy. Portugal klublarynyň 2-si 1-nji tapgyry ýeňiş bilen tamamlady. Awstriýanyň, Niderlandlaryň 2 kluby hem utuldy.
UEFA-nyň ýaryşlaryna ilkinji gezek gatnaşýan toparlardan “Brest” 1-nji aýlawy ýeňiş bilen tamamlasa, “Žirona” iň soňky minutlarda derwezeçisiniň awtogoly bilen ýeňlişe sezewar boldy. Çempionlar Ligasynyň debýutanty “Slawiýa Bratislawa” myhmançylykda uly hasap bilen ýeňildi. 42 ýyldan soň bu ýaryşa wekilçilik edýän “Aston Willa” myhmançylykda 3 utugy 3 gol bilen gazandy. 60 ýyldan soň UEFA-nyň iň uly klub ýaryşynda çykyş edýän “Bolonýa” öz meýdançasynda golsuz deňme-deň oýnap, 1-nji tapgyry 1 utuk bilen tamamlady.
Ýaryşyň täze möwsümdäki ilkinji goluny “Ýuwentus” toparynyň türkiýeli ýaş oýunçysy Kenan Ýyldyz geçirdi.
Myhmançylykda “Monakodan” 2-1 hasabynda asgyn gelen “Barselonanyň” ýeke-täk goluny geçiren Lamin Ýamal ýaryşyň çäginde tapawutlanan iň ýaş 2-nji futbolçy boldy. 17 ýaş 68 gün bilen 2-nji bolan Ýamal topardaşy Ansu Fatiniň rekordyny täzelemäge 28 gün ýetmedi. Duşuşykda “Monakonyň” ýeňiş goluny geçiren Jorj Ilenikhena (18 ýaş) fransiýaly Kilian Mbappeniň rekordyny täzeläp, klubunyň UÇL-de gol salan iň ýaş futbolçysy boldy.
1-nji tapgyrda ýaş hasap edilýän futbolçylaryň 7-si – Lamin Ýamal (17), Jorj Ilenikhena (18), Endrik (18), Kenan Ýyldyz (19), Jeými Gittens (20), Zeno Debast (20) hem-de Florian Wirts (21) tapawutlandy. Gittens bilen Wirts 2 gol geçirdi.
4 gol geçiren Harri Keýniň bu ýaryşdaky gollarynyň sany 33-e ýetip, ol iň köp gol geçiren iňlis futbolçysy boldy. Ol bu ugurda 30 golly Weýn Runiden öňe saýlandy.
19 ýyldan soň Çempionlar Ligasyna gatnaşýan “Sparta Praga” 1-nji tapgyrda “RB Salsburg” toparyny 3-0 hasabynda ýeňlişe sezewar etdi.
“Baýeriň” ýaş ýyldyzy Florian Wirts tapgyryň iň ökde oýunçysy diýlip saýlandy.
