Italiýanyň Milan şäheriniň 2 klubunyň biri ýeňse, beýlekisi ýeňlişe sezewar boldy. “Inter” öz meýdançasynda Serbiýanyň “Srwena Zwezda” toparynyň derwezesinden jogapsyz 4 gol geçirdi. 1-nji ýarymda Hakan Çalhanoglunyň jerime urgusyndan geçiren owadan goly bilen hasaba açan italýan kluby 2-nji ýarymda hüjümçileriniň – Arnautowiçiň (59), Lautara Martinesiň (71) hem-de Tareminiň (81 p) gollary esasynda ýeňşini baýram etdi. Arnautowiçiň hem-de Martinesiň gollarynyň paslaryny Mehdi Taremi berip, ol duşuşygyň ýyldyzy diýlip saýlandy.
Milan şäheriniň adybir kluby “Milan” myhmançylykda “Baýer” bilen duşuşyp, iň kiçi hasap bilen utuldy. Lewerkuzenlilere ýeňiş getiren ýeke-täk goly 51-nji minutda Bonifeýs derwezä girizdi. “Milanly” futbolçylaryň ençeme urgusyny derwezeçi Hradeki sowmagy başardy. Şunlukda, “Milan” 2-nji duşuşygynda ýeňlişe sezewar boldy.
