Bütin dünýäniň sabyrsyzlyk bilen garaşýan boks tutluşygy şenbe gününden ýekşenbe gününe geçilýän gijede geçiriler (16-njy noýabrda 17-nji noýabra geçilýän gijäniň daňdanynda). Agyr agramyň ozalky ägirdi Maýk Taýson bilen YouTuber Jeýk Poluň arasyndaky taryhy tutluşyk NFL-iň toparlaryndan “Dallas Kowboýzyň” öz duşuşyklaryny geçirýän Arlington şäherindäki 80 müň orunlyk AT&T stadionynda guralar. “Netflix” tarapyndan göni ýaýlymda beriljek duşuşyk Aşgabat wagty bilen daňdan 06:00-da başlanar (17-nji noýabrda).
80 million dollarlyk duşuşygyň petekleriniň bahasynyň ýokary bolmagy aýratyn bellärliklidir. Boks muşdaklary ringe golaý ýerdäki oturgyçlarda oturyp, tomaşa etmek üçin 2 million dollar tölemeli bolarlar. Umumylykda petekleriň bahasy ýerine görä, 10 müň – 50 müň dollar arasynda üýtgeýär. 80 million dollarlyk pul baýragynyň iki boksçynyň arasynda deň paýlanylmagyna garaşylýar.
58 ýaşyndaky Maýk Taýson karýerasyndaky 57-nji duşuşygyny geçirer. Karýerasyny 2005-nji ýylda tamamlanan Maýk Taýsonyň 44-si nokaut bilen jemi 50 ýeňşi bar. 6 gezek hem garşydaşlaryndan ýeňlen Taýson WBA, WBC hem-de IBF ugurlary boýunça agyr agramda çempionlyk gazanan ilkinji boksçudyr. 2020-nji ýylda görkezme duşuşyk bilen täzeden ringe dolanan Taýson 1997-nji ýylda Ewander Holifild bilen geçiren tutluşygynda garşydaşynyň gulagyny dişläp, taryhy skandaly başdan geçiripdi.
Aslynda sosial wideo platformasy YouTube-de dürli wideo şekilleri bilen adygan 27 ýaşyndaky Jeýk Pol 2018-nji ýylda boksa başlady. 20,8 million yzarlaýjysy hem-de 7,7 milliard gezek tomaşa edilen Pol özi ýaly YouTuber-likden boksa geçen Deži Olatunži bilen professional bolmadyk duşuşykda ilkinji sapar ringe çykypdy. Professional boksçy hökmünde 11 duşuşyk geçiren Poluň 7-si nokaut bilen jemi 10 tutluşykda ýeňiş gazandy. Onuň bilen tutluşyk geçirenleriň arasynda NBA-nyň öňki basketbolçylaryndan Neýt Robinson hem bardy. Amerikaly boksçy Jeýk Poluň karýerasyndaky ýeke-täk ýeňlişi 2023-nji ýylyň fewralynda Saud Arabystanynda britaniýaly Tommi Fýuri bilen geçiren duşuşygynda hasaba alnypdy.
Duşuşykda öň…
Iki boksçy duşuşykdan öň geçirilen metbugat ýygnanyşygynda dartgynly pursatlary hem başdan geçirdi. Pol weteran boksçy Taýsonyň aýagyndan basdy. Taýson bolsa özünde 31 ýaş kiçi täze boksçynyň dulugyna ýelmäp goýberdi. Gapdalyndaky adamlaryň ara girmegi bilen taraplar köşeşdirildi. Bu wakadan soň duşuşygyň dartgyny, özüne çekijiligi hasam artdy. Bu duşuşykdan öň AT&T stadionyna ýygnanjak janköýerlere ýene-de 3 sany uly boks tutluşygy garaşýar. Taýson – Pol duşuşygyndan öňürti super orta agramda Niraj Goýat bilen Windersson Nunýes, ýarym orta agram derejesinde-de Mario Barrios bilen Abel Ramos hem-de zenanlardan super ýeňil agramda Keýti Teýlor bilen Amanda Serrano ringe çykarlar.
