UEFA Milletler Ligasynda “B” Liganyň 3-nji toparçasynda Norwegiýanyň ýygyndysy öz meýdançasynda Gazagystanyň ýygyndysyny 5-0 hasabynda ýeňdi. Duşuşykda gollaryň 3-sini Erling Holann, beýlekileri-de Aleksander Sörlot bilen Antonio Nusa geçirdi. 23-nji, 37-nji hem-de 71-nji minutlarda tapawutlanan Erling Holannyň milli topardaky gollarynyň sany 39 oýunda 38-e ýetdi. Şeýle-de, bu onuň karýerasyndaky 25-nji, şu ýyla geçip bolsa, 6-njy het-trigi hökmünde hasaba alyndy. Onuň şu möwsümde salan gollarynyň sany bolsa 22 oýunda 22 gola ýetdi.
Norwegiýanyň ýygyndysy 13 utuk bilen toparçada 1-nji orny eýeledi we “A” Ligada oýnamaga hukuk gazandy. Toparçadaky beýleki oýunda-da öz meýdançasynda Sloweniýa bilen 1-1 deňme-deň oýnan Awstriýa 2-nji orna mynasyp boldy. Ýeke gol hem geçirip bilmedik Gazagystanyň ýygyndysy bolsa toparçany 1 utuk bilen tamamlady. Olar täze möwsümde “C” Ligada oýnarlar.
