PDF
Kataryň Lusail şäherindäki “Lusail” stadionynda FIFA Interkontinental Kubogynyň finalynda Ispaniýanyň “Real Madrid” topary bilen Meksikanyň “Paçuka” topary duşuşdy. 67 müň 249 janköýeriň tomaşa eden oýnunda wenesuelaly emin Hesus Walenzuela jürlewük çaldy. UEFA-nyň wekiliniň doly artykmaçlygynda geçen oýunda “Real” 3-0 hasabynda ýeňiş gazandy. Oýnuň 37-nji minutynda Winisius Junioryň pasyndan soň Kilian Mbappe hasaby açdy. Duşuşygyň 53-nji minutynda Mbappeniň asist etmeginde Rodrigo owadan gol geçirip, hasaby 2-ä çykardy. Oýnuň 84-nji minutynda eminiň penaltisini dürs uran Winisius Junior duşuşyga soňky nokady goýdy. Şunlukda, “Real Madrid” bu kubogy 1960-njy, 1998-nji hem-de 2002-nji ýyllardan soň 4-nji gezek almagy başardy. “Real” bu ugurda “Milandyr” “Boko Huniors” hem-de “Penýarol” toparlaryndan öňe saýlanyp, 1-nji orna geçdi.
Duşuşykdan soň Winisius ýaryşyň “Altyn top”, Federiko Walwerde “Kümüş top” hem-de “Paçuka” toparynyň oýunçysy Elias Montiel “Bürünç top” baýragyna laýyk görüldi.
Şol bir wagtyň özünde bu kubok “Realyň” 2024-nji ýyldaky 5-nji kubogy hökmünde hasaba alyndy. Toparyň tälimçisi Karlo Ançelotti “Realdaky” 15-nji kubogyny gazanmak bilen klubuň rekordynyň täze eýesi boldy. Ol 14 kubokly Migel Munýosy yzda galdyrdy. Bu Ançelottiniň tälimçilik karýerasyndaky 31-nji kubogydyr.
Şeýle-de, “Realyň” horwatiýaly ýyldyzy Luka Modriç klubdaky 28-nji kubogyny asmana göterip, bu ugurda toparyň rekordyny täzeledi.
Mundan 2 ýyl ozal 18-nji dekabrda, şu stadionda Dünýä Kubogynyň finalynda kubogy argentinlere aldyran Kilian Mbappe bu gezek 2 ýyldan soň şol bir günde FIFA-nyň başga bir ýaryşynda çempion bolmagy başardy. Bu onuň “Realdaky” 2-nji, karýerasyndaky 20-nji kubogydyr.
Ýaryşa 6 yklymyň çempiony gatnaşyp, ozalky formatdan üýtgeşiklikde, klublar duşuşyklaryny dürli wagtlarda dürli ýerlerde geçirdiler. 1-nji tapgyrda sentýabrda BAE-niň wekili, AFK-nyň çempiony “Al Ain” Täze Zelandiýanyň “Oklend Siti” toparyny 6-2 hasabynda ýeňdi. Oktýabrda oýnalan duşuşykda, 2-nji tapgyryň çäginde “Al Ain” Müsüriň “Al Ahli” toparyndan 3-0 hasabynda asgyn geldi. Dekabr aýynda bolsa “Paçuka” Libertadores Kubogynyň çempiony “Botafogany” 3-0 hasabynda ýeňdi. Ýene dekabrda geçirilen 3-nji tapgyryň duşuşygynda “Paçuka” “Al Ahlini” ýaryşdan çykaryp (0-0, 6-5 p), finala adyny ýazdyrdy. Ýaryşda UEFA-nyň wekili gönümel finala çykýar.
Interkontinental Kubogy ýaryşy 1960-njy ýyldan bäri Çempionlar Ligasynyň (ozalky Ýewropa Çempion Klublaryň Kubogy) ýeňijisi bilen Libertadores Kubogynyň çempionynyň arasynda 2 oýun esasynda geçirilýärdi. Ýaryş 2004-nji ýyla çenli dowam etdi. Şondan soň formatyny üýtgeden ýaryş 2000-2023-nji ýyllar aralygynda FIFA Klublar Dünýä Kubogy ýaryşy ady bilen geçirildi. Oňa 6 yklymyň çempionlary bilen ýer eýesi topar gatnaşýardy we bir ýurtda guralýardy. FIFA Klublar Dünýä Kubogyny täzeçe görnüşde 4 ýyldan 1 gezek guramak barada netijä gelmeginden soň FIFA Interkontinental Kubogy ýaryşy hem täze görnüşe eýe boldy. FIFA Klublar Dünýä Kubogy geljek ýylyň tomsunda ABŞ-da geçiriler.
