Italiýanyň Kubogy ýaryşynda çärýek finalçylaryň ýene-de 2-si belli boldy. 1/8 finalyň çäginde öz meýdançasynda “Çezenany” kabul eden “Atalanta” topary garşydaşyny 6-1 hasabynda ýeňlişe sezewar etdi. “Atalanta” uly hasaply ýeňiş getiren gollary Zappokosta (4), De Ketelare (8, 35), Samaržiç (27, 71) hem-de Breşianini (54) geçirdi. “Çezena” toparynyň ýeke-täk goluny bolsa 90-njy minutda Siseý öz adyna ýazdyrdy.

Çärýek finala çykan toparlaryň biri-de “Roma” bolup, paýtagtlylar öz meýdançasynda “Sampdoriýany” 4-1 hasabynda utdy. Duşuşykda rimlileriň adyndan Dowbyk (9, 19), Baldanzi (24) hem-de Şomorodow (79) tapawutlandy.

Şu hepdäniň dowamynda “Ýuwentus” hem “Kaliarini” 4-0 hasabynda utup, çärýek finala adyny ýazdyrypdy.

Geçen hepdede geçirilen duşuşyklarda “Bolonýa” “Monzany” (4-0), “Milan” “Sassuolony” (6-1), “Empoli” myhmançylykda “Fiorentinany” penaltileriň netijesinde (2-2, 3-4 p) hem-de “Lasio” “Napolini” ýaryşdan çykarypdy.

Italiýanyň Kubogy ýaryşynda soňky çärýek finalçy şu gije belli bolar. “Inter” öz meýdançasynda “Udinezeni” kabul eder.

Çärýek finalda-da “Ýuwentus” bilen “Empoli”, “Atalanta” bilen “Bolonýa”, “Milan” bilen “Roma”, “Inter” ýa-da “Udineze” bilenem “Lasio” duşuşar. Çärýek finalyň duşuşyklary geljek ýylyň fewral aýynda oýnalar.

Gyzykly bolup bilerЕЩЕ ОТ АВТОРА