PDF
Saud Arabystanynyň paýtagty Er-Riýaddaky “Al-Awwal Park” stadionynda taryhy duşuşyk geçirildi. Italiýanyň Super Kubogy ýaryşynyň finalynda Milan şäheriniň 2 kluby – “Inter” bilen “Milan” özara duşuşdy. Milan derbisinde ýa-da “Derby della Madonnina”-da taryhy kembekden soň ýeňiş gazanan şäheriň adybir topary boldy. “Milan” topary oýna şowly başlasa-da, “Inter” topary 1-nji ýarymyň ahyrynda hasaby açdy. 45+1-nji minutda Lautara Martines 2-3 oýunçyny aldap, topy derwezä girizdi. Bu onuň Milan derbilerindäki 9-njy goly hökmünde hasaba alyndy. “Inter” topary 2-nji ýaryma-da gol bilen başlady. 47-nji minutda De Wreýiň uzak aralykdan beren pasyndan soň eýranly hüjümçi Mehdi Taremi ýerden urgy bilen topy derwezeçi Menýanyň deňinden tora girizdi.
Bu goldan soň “Milanyň” täze tälimçisi Konseýsau 50-nji minutda Rafael Leaony oýna girizdi. 2 minutdan soňam onuň garşysyna gödeklige ýol berlip, bellenen jerime urguda topy derwezä girizen Teo Hernandes aratapawudy 1 gola düşürdi. Oýnuň 80-nji minutynda Teo Hernandes bu gezek asist etdi. Onuň jerime meýdançasynyň içine geçiren topuny alan Kristian Pulişiç hasaby deňledi. Duşuşygyň 90+3-nji minutynda bolsa Leaonyň pasynda topy boş derwezä gönükdiren Temmi Abraham “Milana” ýeňiş getiren oýunçy boldy. Şunlukda, 3-2 hasabynda ýeňiş gazanan “Milan” 8 ýyldan soň 8-nji gezek Italiýanyň Super Kubogyny eýelemegi başardy. Bu ugurda “Inter” bilen deňleşen “Milan” topary 1988-nji ýyldan bäri geçirilýän bu bu ýaryşda mundan ozal, 1988-nji, 1992-nji, 1993-nji, 1994-nji, 2004-nji, 2011-nji we 2016-njy ýyllarda ýeňiji bolupdy. “Milan” topary 5 gezegem finalda ýeňlipdi.
“Milandan” soň yzly-yzyna 3 gezek eýelän 2-nji topar bolan “Interiň” bu ýeňişli ýörişi tamamlanyp, olar hem edil köne bäsdeşleri ýaly 5-nji sapar finalda asgyn geldi.
Italiýanyň Super Kubogyny iň köp gazanan topar “Ýuwentus” bolup, turinliler 9 gezek kubogy eýeledi.
“Milanyň” tälimçisi Seržiu Konseýsau eýýäm 2-nji duşuşygynda kubok gazanyp, “Serie A”-nyň başlan 1929/30 möwsüminden bäri bu toparda iň çalt şeýle başarnyk görkezen tälimçi hökmünde hasaba alyndy.
