PDF
Malaýziýanyň futbol çempionaty “Super Ligada” “Johor Darul Ta’zim” topary taryhy rekordy gaýtalady. Johor Bahru şäheriniň wekili 5 ýyl gowrak wagtdan bäri çempionatda ýeňilmän gelýärler. Ýagny topar 108 oýundan bäri ýeňilmän gelýär we bu ugurda dünýä rekordyny gaýtalady. Bu ugurda rekord Kot-d’Iwuaryň “ASEK Abidžan” toparyna degişlidir.
“Johor Darul Ta’zim” topary soňky gezek 2021-nji ýylyň 30-njy aprelinde öz meýdançasynda “Terrengganu” toparyndan 1-0 hasabynda asgyn gelipdi. Şol ýeňlişden bäri 2021-nji ýylda möwsümiň galan 8 duşuşygynda, 2022-nji ýylda çempionatda 22 oýunda (17 ýeňiş, 5 deňlik), 2023-nji ýylda 26 oýunda (25 ýeňiş, 1 deňlik), 2024/25 möwsüminde 24 oýunda (23 ýeňiş, 1 deňlik) 2025/26 möwsüminde-de 24 oýunda (23 ýeňiş, 1 deňlik) ýeňilmedi.
Ýaňy ýakynda bassyr 12-nji çempionlygyny baýram eden “Johor Darul Ta’zim” topary 2014-nji ýyldan bäri çempionlygy özünde saklap gelýär. Topar şol döwürde 3 gezek 1 möwsümde 3 kubogy gazanmagy, ýagny trebl etmegi başardy. Şu möwsümde 24 oýunda 117 gol geçiren “Johor Darul Ta’zim” topary 10 gol geçirtdi. Malaýziýanyň Soltany Ibrahim Iskanderiň ogly Tunku Ismail Idrisiň eýeçiligindäki kluba ispaniýaly Sisko Munýos tälim berýär. Topar şu möwsümde käbir duşuşyklarda 14-1, 10-0, 8-0, 7-0, 7-1 ýaly hasaplar bilen ýeňiş gazandy. Malaýziýanyň çempionaty möwsüm şu hepdäniň ahyrynda tamamlanyp, Johor Darul Ta’zim topary ähli duşuşyklaryny geçirdi. Ýagny olaryň rekordy öz atlaryna geçirmegi üçin täze möwsüme garaşmagy gerek.
Kot-d’Iwuaryň “ASEK Abidžan” topary 1989-1994-nji ýyllar aralygynda milli çempionatda 108 oýunda ýeňilmändi. Afrika yklymynyň wekili bu ugurda Rumyniýanyň ozalky “Stýaua” häzirki FKSB toparynyň rekordyny täzeläpdi. “Stýaua” topary 1986-1989-njy ýyllar aralygynda 104 duşuşykda ýeňilmän, bu ugurda 100-den ilkinji topar bolupdy.
Mýanmanyň “Şan Ýunaýted” topary-da 2020-nji ýyldan bäri çempionatda 98 duşuşykda ýeňilmän gelýär. Täze möwsümde olaryň hem 100-den geçmegine, hatda iň bolmanda rekordy gaýtalamagyna garaşylýar.
