Ýer ýüzünde daglaryň, derýalaryň, tokaýlaryň, çölleriň bolşy ýaly, ummandyr deňizlerde hem otlar, dürli görnüşli jandarlar, daglar, akymlar bar. Deňizdäki jandarlary kislorod bilen üpjün edýän ösümlikleriň biri hem umman posidonydyr (“Posidonia oceanica”). Oňa başgaça Neptun oty, Ortaýer haşal oty hem diýilýär. Bu otlar Ortaýer we Egeý deňizlerinde 1 metrden 40 metre çenli çuňlukda ösýär. Bu otlar gury ýerdäki tokaýlar ýaly fotosintez arkaly öndürýän kislorodyny suwa goýberip, deňiz jandarlarynyň ýaşamagy üçin şert döredýär. Gün şöhlesiniň ýetýän çäginde ösýän otlar tolkunyň we akymyň hereketini azaldyp, suwuň dury bolmagyny üpjün edýär.
Onuň baldaklary deňziň aşagynda keseligine we dikligine ösýär. Olar adaty ýagdaýda keseligine, haýsydyr bir sebäp bilen çendenaşa köp çäge ýygnalsa, dikligine ösýär. Olar noýabr-dekabr aýlarynda gülleýär. Kenarýaka ekosistemasy üçin ähmiýetli bolan bu ösümlikler beýleki jandarlaryň ýaşamagy we köpelmegi üçin amatly şert döredýär. Ortaýer deňzindäki jandarlaryň 25 göterimi bu ösümlikleriň emele getirýän “öri meýdanlarynda” ýaşaýar.
Olaryň guran ýapraklary tolkunyň täsiri bilen biri-birine ýapyşyp, ýumak görnüşli bolýar. Kenara çykan bu topjagazlar şemalyň badyna has uzaga hem gidýär. Italýanlar oňa “deňiz zeýtuny” (“l’oliva di mare”), deňiz topy (“palle di mare”) ýa-da deňiz kartoşkasy (“patate di mare”) diýýärler. Deňziň gumluk ýerlerinde ösýän bu otlar kenarda topragyň eroziýasynyň öňüni alýar, suwy arassalaýar. Bu ösümlikleriň baldaklary porruk bolýar. Ösümligiň ýaşyl ýapraklary 1,5 metre çenli ösýär. Ýapraklarynyň ini 1 sm bolup, her düýp otuň 13-17 ugurdaş ösýän köki bolýar. Keseligine ösýän kökleri bolsa, has köp ýeri tutýar. 2016-njy ýylda Iwisa adasynyň günortasynda bir düýp otuň 8 km meýdany eýeländigi anyklandy. Ol otuň 100 müň ýaşandygy çaklanylýar. Belki-de, bu ot Ýer ýüzündäki iň köp ýaşly janly organizm hem bolup biler.
