PDF
10-njy iýunda Barselona şäherinde Sagrada Familiýa ybadathanasynyň täze tamamlanan we iň beýik bölegi bolan Isa Mesih diňiniň dabaraly açylyşy boldy. Beýikligi 172,5 metre barabar bolan bu desga Rim Papasy Lew XIV tarapyndan mukaddesleşdirildi we Sagrada Familiýa resmi taýdan dünýäniň iň belent ybadathanasy diýlip ykrar edildi. Taryhy dabarada Ispaniýanyň Patyşasy Felip VI, Şa zenan Letisiýa we Premýer-ministr Pedro Sançes ýaly ýokary derejeli resmi myhmanlar, şeýle hem dünýäniň dürli künjeklerinden gelen 120 müňe golaý tomaşaçy gatnaşdy.
Giň gerimli medeni çäreleriň we güýçlendirilen howpsuzlyk çäreleriniň çäginde geçen dabara dron görkezilişleri, ägirt uly yşyklandyryş dabaralary hem-de feýerwerkler bilen utgaşdyryldy. Ýokary derejeli dini dabaradan soňra, ybadathananyň daşynda çagalar horunyň ýerine ýetiren aýdymlarynyň owazy astynda täze diňiň depesindäki ägirt uly keramiki haç dabaraly ýagdaýda ýagtyldyldy.
Häzirki wagtda ybadathananyň binalar toplumynda jemi 18 sany diň bar bolup, täze gurlan merkezi desga bütin şäheriň binagärlik keşbiniň esasy aýratynlygyna öwrüldi. Ýokary taryhy we medeni ähmiýete eýe bolan bu desganyň gurluşyk işlerini geljekki on ýyllygyň dowamynda doly tamamlamak meýilleşdirilýär.
